АЛРОСА АК уонна “Анаабыр алмаастарыгар” махтанабыт

Саха сирин олохтоохторо соторутааҕыта кыыл табалар Өлөөн улууһун дьиэ табаларын илдьэ барбыттарын туһунан сураҕы истибиттэрэ. Бу түгэнинэн “Өлөөн” МУП кылаабынай зоотехнига, улуус дьокутаата Марина Николаева санаатын маннык үллэһиннэ:

— Биллэрин курдук, быйыл Красноярскайга кыыл таба ахсаанын ааҕан, 110 тыһ. ахсааннаах  үөр баарын быһаарбыттара. Ол үөр кыыл табалар кэлэн алтынньы ый бүтүүтэ биһиги ыстаадаларбыт  табаларын илдьэ бардылар. Онно тута дьаһал ылан, улууспут баһылыга Лена Иванова бөртөлүөт көтүппүтэ, ол бөртөлүөтүнэн ыстаадалар балаһыанньаларын илэ харахпытынан көрөн, бэнсиини уонна дьону таһаарбыппыт. Ол кэннэ Лена Иванова АЛРОСА АК  салалтатын кытта кэпсэтэн,  хампаанньа эбии бэйэтин үбүлээһининэн 2 бөртөлүөт үлэлиирин ситиспитэ. Онон, түгэнинэн туһанан, АЛРОСА АК салайааччытыгар Павел Маринычевка, “Анаабыр алмаастара” хампаанньа салайааччыта Алексей Окороковка  “Өлөөн” МУП саамай ыксаллаах балаһыанньаҕа киирбитигэр бөртөлүөт көрөн, көтүүнү тэрийбиттэрин иһин махтанабыт. Ону тэҥэ РНА СС Ирбэт тоҥ биологическай кыһалҕаларын үөрэтэр институт дириэктэригэр И.М.Охлопковка, Москва куораттан “ЭС-ПАС” ХЭТ   салайааччытыгар Сальман А.Л.  эмиэ махталбытын тиэрдэбит. Кинилэр спутниковай моойторугунан кыыл таба  маршрутун күн аайы ыыта олороллор. Кыыл таба туох да омуна суох сааскы уу кэлиитигэр, айылҕа хоромньуну аҕалар көстүүтүгэр тэҥнээх. Ыстаадабыт табаһыттара көрөн-истэн элбэппит табаларыттан ытыс соттоллоро эмиэ тустаахтарга олус кыһыылаах, бу дьон төһөлөөх уйулҕа өттүнэн, эмоциональнай охсууну ылалларын хаһан да учуоттамматаҕа. Ааҕан көрүүбүтүнэн, 70 тахса мөл. солк. хоромньу таҕыста. Дьэ, маннык ыксаллаах, айылҕа тургутар түгэннэригэр үрдүк сайдыылаах технология, беспилотник баара буоллар  диэн эмиэ саныыгын. Бу маннык улахан дьайыы бүтэһигин 2015 с. тахсан турар. Уонна, хомойуох иһин,  бу 9 сыл буолан баран, эмиэ хатыланна. Билигин дьоммут табалана сатыыллар, кыыл табаны кытта барбыт дьиэ табата сүрдээх киэҥ сиринэн тарҕанан турар, онно, биллэн турар, тиэхиньикэ, элбэх бэнсиин наада. Адаар таас быыһыгар табалары  көрдүүр олус  ыарахаттардаах. Хаалбыт табаны табаһыттарбыт көрөллөр-истэллэр. Билиҥҥи күҥҥэ тахсыбыт уматыктара бүтэн, улуус баһылыга Лена Иванова эбии үп көрөн, бэнсиининэн хааччыллыахтара.

Биһиги баһылыкпыт Лена Иванова уонна Ил Түмэн дьокутаата Елена Голомарева бырабыыталыстыбаны кытта күүскэ үлэлэһэллэр, урут даҕаны СӨ Бырабыыталыстыбата улахан көмөнү оҥорбута, онон бу да сырыыга биһиги Ил Дархаммыт  А. С.Николаев, СӨ Бырабыыталыстыбата, Ил Түмэн көмөлөһүөхтэрэ диэн эрэнэбит.