АЛРОСА — биһиги доруобуйабытыгар кылаата

Ааспыт үйэ 60-с сылларыттан сулууспалаабыт урукку поликлиника тымныы көрүдүөрүгэр уочараты улуус олохтоохторо билигин да өйдүүллэр. Рентгеҥҥэ, флюорографияҕа уһулларга уонна анаалыстары туттарарга атын тымныы дьиэлэргэ барарга күһэллэрбитин санаан кэлиэҕиҥ эрэ. Дьиэ иһигэр баар бэйэтэ да аҕыйах санузел үксүгэр алдьанан сабыылаах турара. Терапия уонна оҕо отделениелара сиҥнэн эрэр икки этээстээх дьиэҕэ үлэлииллэрэ. Оҕо уонна дьахтар консультацията, стоматология перинатальнай кииҥҥэ бааллара атын отделениелары кытары үлэлиири биллэ уустугурдара.

Билигин биһиги ити ааспыт кэмнэри барытын махталы кытары атаарар кыахтаахпыт. Тоҕо диэтэххэ, улуус киинигэр АЛРОСА көмөтүнэн тутуллубут балыыһа комплекса төрдүс сылын ситиһиилээхтик үлэлиир.
Доруобуйа харыстабылын дьиэтин тутууга алмаастаах хампаанньа 658 мөлүйүөн солкуобайы биэрбитэ. 2015 сыллаахха уопсайа 3 тыһыынча кв.м. тахса иэннээх эбийиэги былааннааһын саҕаламмыта. Хайыы үйэ 2016 сыл алтынньы 5 күнүгэр Баатаҕай бөһүөлэгэр бастакы акылаат түһэриллибитэ. Тутуу 5 сыл ыытыллыбыта уонна 2021 сыллаахха балыыһа комплекса толору үлэҕэ киллэриллибитэ. Субуотунньуктар хайдах тэриллибиттэрин, саҥа балыыһа түргэнник эмтэнээччилэри көрсөрүн туһугар тэрилтэлэр хайдах курдук үөрэн-көтөн туран балыыһа дьиэтин хомуйсубуттарын, ыраастаабыттарын өйдүүбүт.
Балыыһа комплексыгар терапия уонна оҕо отделениелара, поликлиника, оҕо консультацията, стоматология, «суһал көмө», рентгенология, лаборатория бааллар. Мэдиссиинэ чинчийиилэрин барар табыгастаах уонна судургу буолла. Эбийиэги доруобуйаларынан хааччахтаах дьоҥҥо наадалаах тэриллэринэн хааччыйбыттара улахан суолталаах.

Владимир Докторов, Дьааҥы Оройуоннааҕы киин балыыһатын кылаабынай бырааһа:
«Балыыһабыт нэһилиэнньэни мэдиссиинэ өҥөтүнэн хаачыстыбалаахтык хааччыйар. Саҥа балыыһаҕа бастакы сүһүөх звено үлэһиттэрэ уонна сэдэх исписэлиистэр: терапевтар, педиатрдар, невролог, хирург, онколог, окулист, стоматологтар, акушер-гинеколог, дерматовенеролог, инфекционист, рентгенолог уо.д.а. быраастар нэһилиэнньэ доруобуйатын көрөллөр. Балыыһа подразделениелара мэдиссиинэ аныгы тэриллэринэн сэбилэммит киэҥ-куоҥ уонна сырдык, ыраас кэбиниэттэргэ үлэлииллэр.

Кэрэхсэбиллээҕэ диэн, балыыһа саҥа комплексыгар эмтэнээччилэр хаачыстыбалаах чинчийиини ааһаллар, оттон быраастар тупсаҕай усулуобуйаҕа үлэлииллэр.
Эмчиттэргэ ультразвуковой диагностика саҥа аппарааттара, офтальмология тэриллэрэ, электрокардиографтар, маммограф баар буоллулар. Биһиги икки массыынаны ылбыппытыттан биирэ мэдиссиинэ суһал көмөтүн ыстаансыйатыгар ананар. Мэдиссиинэ бастакы көмөтүн оҥорорго уонна ыарахан ыарыһахтары быыһыырга наадалаах тыҥа ускуустубаннай вентиляцията, дефибриллятор, электрокардиограф, компрессионнай ингалятор, араас эчэйиигэ уонна төрүүр дьахтарга туттуллар тэриллэр уо.д.а. баар буоллулар.
Аныгы тэриллэри атыылаһар кыах балыыһа саҥа комплекса үлэҕэ киириитин кытта быһаччы сибээстээх.
Биһиги АЛРОСА-ҕа улахан кылаатын иһин уонна киһиэхэ саамай күндүнү -– олоҕу уонна доруобуйаны харыстааһыҥҥа көмөтүн иһин олус махтанабыт».

Жанна Никитина, поликлиника ыстаарсай сиэстэрэтэ:
«Балыыһабытыгар мэдиссиинискэй кыраһыабай көстүүмнэрбитин үөрэ-көтө кэтээт, үлэлиир сирбитигэр ааһабыт. Оҕо уонна терапия отделениелара биир дьиэҕэ поликлиниканы кытта бааллара уонна санитарнай узеллар оҕолорого, үлэһиттэргэ, эмтэнээччилэргэ туспалара олус табыгастаах.
Поликлиника эргэ дьиэтигэр олус кыараҕас уонна тымныы этэ. Саҥа балыыһаны туппатахтара буоллар, билигин да хайдах үлэлии сылдьыахпыт эбитэ буолла, өйбөр батан киирбэт.
Кэлин функциональнай кэбиниэттэр, физиокабинет, УЗИ, ФЛГ, рентгенография, маммография, көмпүүтэр томографията (КТ) эбилиннилэр. Көмпүүтэр томографията бэлэм буолла, сотору үлэлиэҕэ, исписэлиистэр Дьокуускай куоракка сэртипикээт туттаран ылаллара эрэ хаалла.
Аны үс сылынан саҥа исписэлиистэри -– Нерюнгритааҕы мэдисссиинэ кэллиэһин бүтэрээччилэри тулуйбакка күүтэбит. Кинилэр «Арктика» ЦПРК базатыгар Баатаҕай бөһүөлгэр үөрэнэллэр. Онон мэдиссиинэ сиэстэрэтэ тиийбэтин боппуруоһа быһаарылларыгар эрэллээхпин. Ол гынан баран, быраастар бакаансыйаларын туһунан боппуруос билигин да аһаҕас хаалар.
Төһө да каадырдар тиийбэттэрин иһин, поликлиникабыт 60 киһилээх оройуоннааҕы балыыһа саамай улахан подразделениетынан буолар. Мин 20 сыл ыстаастаах исписэлиис быһыытынан бигэргэттэхпинэ, биһиги кэлэктииппит олус түмсүүлээх. Онон куттаммакка эрэ биһиги хамаандабытыгар киириҥ: барытыгар үөрэтиэхпит уонна өйүөхпүт.
Биһиги бырабыыталыстыбабытыгар уонна АЛРОСА-ҕа үрдүк таһымнаахтык үлэлиир кыаҕы биэрбиккитигэр махтанабынт».

Тамара Садовникова, терапия отделениетыгар эмтэнээччи:
«Мин 1946 сыллаахха төрөөбүтүм, Баатаҕайтан ханна да барбатаҕым. Онон бөһүөлэккэ туох буолбутун барытын өйдүүбүн. Терапия балыыһа атын тутууларыттан туспа баара, оҕо, хирургия отделениелара уонна суһал көмө эмиэ туспа дьиэҕэ үлэлииллэрэ.
Билигин барыта тубуста, олус табыгастаах буолла. Арай, быраастар тиийбэттэрэ хомолтолоох. Биллэн турар, балыыһабыт олус кырасыабай, ыраас, сылаас, бэл, кыратык итии. Киһи кута-сүрэ тохтуур тупсаҕай усулуобуйаҕа эмтэнэрбититтэн олус үөрэбин. АЛРОСА-ҕа улахан махталбын тириэрдэбин!»

Алексей Дьячковскай, АЛРОСА генеральнай дириэктэрин солбуйааччы:
«Биһиги Саха сирин олохтоохторо өрөспүүбүлүкэҕэ алмааһы хостооһун аҕалар дьиҥнээх туһатын бэйэлэринэн билэллэригэр куруук дьулуһарбыт. Ол иһигэр,  Саха сирин бүддьүөтүгэр киирэр нолуок үбүн уонна дивиденнэри тэҥэ, биһиги сыл аайы хас да миллирд солкуобайы социальнай бырайыактарга, ол иһигэр саҥа балыыһалары уонна реабилитация кииннэрин тутууга/  ыытабыт. Бу үлэҥ түмүгүн көрөрүҥ уонна олохтоохтортон махтал тылларын истэриҥ санааҕын көтөҕөр. Баатаҕай бары олохтоохторугар кытаанах, эбэтэр АЛРОСА-ҕа этэллэринии, алмаас курдук доруобуйаны баҕарабын».

«Вести Верхоянья» хаһыат суруйуутуттан тылбаас