АЛРОСА: эдэрдэргэ суол аһаҕас

Үрдүк таһымнаах үлэһит ханнык баҕарар хампаанньаны хамсатааччынан буолар. Ол да иһин,  АЛРОСА бэйэтин улахан хамаандатын хас биирдии кыттааччыта үүнэригэр-сайдарыгар уонна кыаҕын олоххо сөптөөхтүк туһанарыгар усулуобуйаны тэрийэргэ кыһаллар.

АЛРОСА үлэһиттэрин корпоративнай үөрэх систиэмэтэ сайыннарар. Хампаанньа үөрэххэ бырагыраамалара идэҕэ уонна лиидэр дьоҕурдарыгар хайысхаланаллар уонна үлэһиттэр бары араҥаларын хабаллар. Хампаанньа үлэһиттэрэ тугунан да сыаналаммат уопуттарын уонна билиилэрин биир идэлээхтэригэр биэрэллэр, кинилэри үөрэтиигэ кытталлар.

Үөрэх систиэмэтин сайыннарыыга сүрүн оруолу үөрэх бырагыраамаларын оҥорор, үлэһиттэри сыаналааһынынан уонна аттестациянан дьарыктанар  АЛРОСА Корпоративнай университета ылар.

Хампаанньа кэлэктиибэ сыл аайы саҥа үлэһиттэринэн, ол иһигэр,  эдэр исписэлиистэринэн эбиллэр. Эдэрдэр бэйэлэрин дьоҕурдарын көрдөрөллөрө уонна корпоратив олоҕор түргэнник киирэллэрэ олус суолталаах. Онуоха  туһалаах үнүстүрүмүөнүнэн  хамаанданан сиэссийэ буолар. Манна хас биирдии киһи бэйэтин көрдөрүөн, долгутар боппуруостары дьүүллэһиэн, саҥа бырайыактары уонна этиилэри киллэриэн сөп.

Соторутааҕыта АЛРОСА Корпоративнай университетыгар биир итинник трениҥҥэ Новосибирскайтан, Дьокуускайтан, Мииринэйтэн, Удачнайтан, Айхалтан уонна Арыылаахтан 40 эдэр исписэлиис кытынна.

Корпоративнай университет дириэктэрэ Анна Подкаменная:  «Биһиги хас биирдии кыттааччы туох эрэ уратытын сыаналыыбыт уонна толкуйун, саҥа санааларын көҥүллүк атастаһарын биһириибит. Бэйэлэрин санааларын кыбыстыбакка этэллэригэр ыҥырабыт. Чуолаан хорсун идеялар сайдыыны хамсатааччынан буолаллар уонна биһиги үчүгэй  түмүктэри ыларбытыгар көмөлөһөллөр”, — диэн бэлиэтээн эттэ.

Сиэссийэ өй-мэйии кимэн киириитин  быһыытынан барбыта. Кыттааччылар кыра оробуочай бөлөхтөргө хайдыһан, саҥа толкуйдара быраактыкаҕа хайдах туттуллалларын дьүүллэспиттэрэ уонна былаан оҥорбуттара. Тэрийээччилэр эдэр исписэлиистэргэ “айар” көҥүлү биэрбиттэрэ.

Ол түмүгэр эдэр исписэлиистэр 10-тан тахса кэскиллээх санааны киллэрбиттэрэ. Чуолаан, араас идэ бэрэстэбиитэллэрин кытары үөрүйэҕи атастаһарга, эдэр үлэһиттэргэ лидерскэй компетенцияларыгар үөрэх бырагырааматын оҥорорго этии киллэрбиттэрэ.

«Бэйэ толкуйун биллэрэр, санааны үллэстэр, туох эрэ саҥаны билэр кыах баара олус туһалаах. Ханнык баҕарар эйгэҕэ бэйэ дьоҕурун, талаанын тупсарарга дьулуһуу баар буолар. Биһиги хамаандабыт  социальнай медиаларга контены билиһиннэрии, өрө таһаарыы  бырайыагар үлэлээбитэ. Эдэр исписэлиистэри тардарга видео уонна аудиа-матырыйааллары оҥорорго былааннары торумнаабыттара. Суол каартатын бэрээдэгинэн – бастакы хардыыттан олоххо киллэриэххэ диэри оҥорбуттара, сыал-сорук туруорбуттара. Элбэх саҥаны уонна интэриэһинэйи билбиттэрэ. Саҥа социальнай, үөрэтэр, сайыннарар бырайыактары ханнык ньыманан олоххо киллэрэри дьүүллэһии эрэ интэриэһинэй буолбатах этэ, баар балаһыанньалары ырытан, бэриллибит кейстары быһаарар  өссө интэриэһинэй этэ. Мин санаабар, маннык трениннэргэ билии-көрүү  эрэ буолбакка, улахан оруоллаах   киһи тус хаачыстыбата, сатабыла, үөрүйэҕэ  быһаарыллар. Мин хампаанньа атын подразделениеларыгар үлэлиир биир идэлээхтэрбин кытары билсэн олус үөрдүм. Кинилэр бары олус өйдөөхтөр, көхтөөхтөр, саҥаттан саҥа санаалаахтар уонна хампаанньа сайдарыгар интэриэстээхтэр”, — диэн ЯПТА сортировка уонна комплектация сыаҕар алмааһы араартааччы Анастасия Петрова кэпсээтэ.

Анастасия АЛРОСА-ҕа балтараа сыллааҕыта кэлбитэ уонна хайыы үйэ кэлэктиипкэ үчүгэйдик киирдэ, Дьокуускайга АЛРОСА алмааһынан эргиниигэ тэрилтэтин эдэр исписэлиистэрин  сэбиэттэрин чилиэнэ. Сэбиэт социальнай уонна волонтер хайысхатыгар үлэлиир, култуура  дьаһалларын тэрийэр уо.д.а.

Анастасия Петрова олоххо дьулуура уонна аан дойду таһымнаах Саха сирин улахан хампаанньатыгар үлэлиир баҕа санаата АЛРОСА-ҕа кыттыгастаах  буоларга көмөлөспүттэрэ.  Уус Алдан улууһун Г.В.Егоров аатынан 1 №-дээх Мүрү орто оскуолатын үөрэнээччитэ Настя алмааска үлэлиир баҕалааҕын өссө оскуолаҕа үөрэнэ сылдьан билбитэ.

«Миигин ийэм холобура көҕүлээбитэ, кини урут “ЭПЛ Даймонд” тэрилтэҕэ технологынан, бриллианнары сыаналааччынан үлэлээбитэ.  Мин бэйэм олохпун сыаналаах таастарга аныахпын баҕарбытым, тоҕо диэтэххэ, алмаастар – биһиги өрөспүүбүлүкэбит киэн туттуута. Саамай сыаналаах тааһы илиигэр ылан тутар олус долгутуулаах уонна интэриэһинэй этэ”, — диэн Анастасия  кэпсиир.

Анастасия М.К.Аммосов аатынан ХИФУ физико-техническай институтун сыаналаах таастары уонна тимирдэри обработкалааһын кафедратыгар инженер-технолог идэтин ылбыта. Кини быраактыкатын хас да сыл ЯПТА-ҕа барбыта уонна хайыы үйэ бэйэтигэр эрэллээх сортировщигынан кэлбитэ.

«Быраактыкалар кэмнэригэр миэхэ настаабынньыктарым Саргылана Николаевна Егорова уонна  Лена Христофоровна Ядрихинская олус көмөлөспүттэрэ. Кинилэр сортировка уонна комплектация сыаҕар эспиэрдэринэн үлэлииллэр. Кинилэр өйөбүллэринэн мин үлэҕэ наадалаах үөрүйэҕи түргэнник ылынар кыахтаммытым уонна быраактыка кэмигэр тута кэриэтэ алмааһы араартаан барбытым. Бытархай алмааһы кытары үлэлиир бастаан ыарахан этэ. Хойут сатабыл баар буолбута, син түргэнник  быһаарсар буолбутум. Барыта үлэҕэ үөрүйэҕи кытары кэлэр”.

Билигин Анастасия  үлэтигэр күн аайы араас кээмэйдээх, араас хаачыстыбалаах алмааһы кытта үлэлиир. Кини тэбис-тэҥ алмаас суох, хас биирдии алмаас туох эрэ дьиктилээх диэн эрэллээхтик бигэргэтэр кыахтаах.

«Мин үлэбин олус сөбүлүүбүн, манна нус-хас эйгэ, хас биирдиибит үлэлиир миэстэтэ олус табыгастаах. Сүрүнэ – кэлэктииппит биһигини өйдүүр, өйүүр. Мин илиим нөҥүө олус элбэх алмаас ааһар. Ол иһин, алмаас хостонуоҕуттан саҕалаан,  ювелирнай киэргэл буолуор диэри уһун айаныгар кыттыгастаахпыттан олус үөрэбин”, — диэн Анастасия инникини санаан сыал-сорук туруоруннахха, барыта табылларын туһунан этэр.

АЛРОСА пресс-сулууспатын суруйуутуттан тылбаас