Хаартыска: АЛРОСА пресс-сулууспата
Ыам ыйын 27 күнүгэр АЛРОСА Экологияҕа киинин исписэлиистэрэ балык Чернышевскайдааҕы собуотун кытары Чернышевскай бөһүөлэгин таһыгар Бүлүү өрүскэ чыыр 800 тыһыынча кэриҥэ ыаматын ыыттылар. Уулаах сирдэргэ ускуустубаннай оҥорон таһаарыы үлэтин АЛРОСА хампааннньа экологияҕа куттал суох буолуутугар уонна тулалыыр эйгэни харыстааһыҥҥа биир кэлим бырагырааматын чэрчитинэн ыытта.
Чыыр – олус үчүгэй хаачыстыбалааҕынан биллэр балык. Ону сэргэ балык бу көрүҥэ Саха сирин уулаах сирдэрин экосистиэмэлэригэр дьоһун суолталаах, балык арааһа элбииригэр көмөлөөх. Чыыр буортулаах организмнары сиэн, уу хаачыстыбатын тупсарар уонна балык үөскүүрүн элбэтэр.
“Айылҕа эйгэтин харыстыыр уонна эрэгийиэннэргэ нэһилиэнньэ доруобуйатын туһугар хампаанньа Экологияҕа киинэ араас тэрээһини ыытар. Олор ортолоругар уулаах сирдэри балык арааһынан толоруу киирэр. Чуолаан, балык Чернышевскайдааҕы собуотун кытары биһиги сыл аайы өрүстэргэ уонна күөллэргэ балыктары ыытабыт. 2011 сылтан исписэлиистэрбит чыыры үс төгүл ыыттылар. Чыыр, хатыыс, тууччах курдук балык сыаналаах көрүҥнэрин элбэтии уонна харыстааһын АЛРОСА айылҕа харыстабылыгар үлэтин биир сүрүн хайысхатынан буолар. Бу үлэлэр Саха сирин өрүстэригэр балык арааһа элбииригэр уонна балыктанар көрүҥнэри чөлүгэр түһэрэргэ көмөлөһүөхтэрэ”, — диэн АЛРОСА Экологияҕа киинин дириэктэрэ Анастасия Габрашитова кэпсээтэ.
Чыыры ууга элбэтии – хампаанньа сыл аайы өрүстэри балыгынан толорор үлэтин бастакы түһүмэҕэ. Аныгыскыга, хампаанньа үлэһиттэрэ бэс ыйын саҥатыгар Өлүөнэ өрүскэ тууччах балыгы, оттон күһүн Бүлүү өрүскэ хатыыс 60 тыһыынча ыаматын ыытыахтара.
АЛРОСА хампаанньа бу үлэлэргэ сыл аайы 10 мөлүйүөн суумалаах үбү биэрэр. АЛРОСА ихтиофаунаны чөлүгэр түһэрэргэ тус бырагырааматын таһынан, өссө сокуонунан көрүллэр булгуччулаах төлөбүрдэри хааччыйар. Былырыын хампаанньа экологтара уонна Чернышевскайдааҕы собуот үлэһиттэрэ Бүлүүтээҕи водохранилищены 3,9 мөлүйүөн кэриҥэ быраҥааттанан уонна Бүлүү өрүһү 20 тыһыынча хатыыс ыамаларынан толоруохтара.
Дьокуускайга полиция 4-с №-дээх отделын дьуһуурунай чааһыгар олохтоох киһи баарга сылдьан суотабай төлөпүөнүн уордарбытын, счетуттан…
Нижнэй Новгородка Бүтүн Арассыыйатааҕы “Профессионаллар” идэ маастарыстыбатын чөмпүйэнээтин түмүктүүр түһүмэҕин креативнай индустрия уонна информационнай технологиялар…
Бэҕэһээ, Оҕо көмүскэлин күнүгэр Москваҕа дойду саамай чаҕылхай, талааннаах оҕолоро муһуннулар. Манна “Дороги, которые мы…
Ленскэй оройуонун суута олохтоох эр киһини РФ холуобунай кодексатын 111 ыст. 1 ч. буруйдаата. Ол…
Халыма, Алдан өрүстэргэ уу таһыма үрдээтэ. Ол курдук, Аллараа Халыма Походскайыгар, Алдан Чагдатыгар, Уус Маайа Уус…
Туймаада ыһыаҕар БПЛА-ны көтүтэри боптулар. Бобууну кэстэххэ административнай уонна холуобунай эппиэтинэскэ тардыллыахха сөп. Дьокуускай куорат…