АЛРОСА хампаларга тыраахтар бэлэхтээтэ

17.07.2024, 10:39

Хаартыска: Бүлүү улууһун пресс-сулууспата.

Бөлөххө киир:

Бүлүү улууһун Арыылаах нэһилиэгэр улахан үөрүүлээх күн тосхойдо. Үбүлүөйдээх ыһыахха нэһилиэктэр икки ардыларыгар кыайыыларын иһин, АЛРОСА «Беларусь» тыраахтары бэлэхтээтэ.

Бүлүү улууһун баһылыга Сергей Винокуров этэринэн, нэһилиэктэр икки ардыларынааҕы күрэс сыл аайы ыытыллар. Олохтоохтор төһө көхтөөхтүк кытталлара, ыһыаҕы төһө үчүгэйдик ыыталлара, тэрээһиннэри айымньылаахтык тэрийэллэрэ, барыта көрүллэр. Быйыл Арыылаах нэһилиэгэ кыайбыта.

Баһылык АЛРОСА хампаанньа генеральнай дириэктэрэ Павел Маринычевка махтанна.

Сабыс-саҥа тыраахтар Мииринэйтэн Бүлүүгэ, онтон Арыылаах нэһилиэгэр — Хампаҕа диэри айаннаан кэллэ.

— Нэһилиэкпит олохтоохторо бары олус үөрдүлэр. Биһиэхэ элбэх айар уонна уопсастыбаннай түмсүүлэрдээхпит, олох оргуйан олорор. Бирииспитин ыла диэн 40-тан тахса киһи кэллэ, онтон дойдубутугар төттөрү барарга тыраахтарбытыгар нэһилиэк былааҕын иилэн, үөрэ-көтө айаннаатыбыт, — диэн Арыылаах нэһилиэгин баһылыга Афанасий Тимофеев кэпсээтэ.

Тыа сиригэр тыраахтар көмөтө баһаам буоллаҕа. Оттооһун, суолу оҥоруу, бөҕү таһыы, о.д.а. үлэлэр тыраахтара суох барбаттар. 2017 сыллаахха нэһилиэк олохтоох көҕүлээһиннэри өйүүр бырагырааманан тыраахтар ылбыта. Онон, икки тыраахтарданан, хампалар үөрүүлэрэ үгүс, АЛРОСА хампаанньаҕа махтаналлар диэн СИА бэлиэтэнэр.

АЛРОСА хампаларга тыраахтар бэлэхтээтэ

Сообщить об опечатке

Текст, который будет отправлен нашим редакторам: