АЛРОСА  каадырдары кытары үлэлиир үөрүйэҕэ биһирэннэ

Дьокуускайга “Бырамыысыланнас уонна геология чинчийиитэ”  Уһук Илиҥҥи пуорум чэрчитинэн  “Бырамыысыланнаска ыччат саҕалыыр кыаҕа” диэн кэпсэтэр-дьүүллэһэр былаһаакка үлэлээтэ. Дьүүллэһиигэ өрөспүүбүлүкэ  үөрэҕин тэрилтэлэрин бэрэстэбиитэллэрэ, ыччат уонна бырамыысыланнас хампаанньалара кытыннылар.

 Былаһаакка модератора уонна тэрийээччи –  Хотугу сир сайдыытыгар көмөлөһөр пуонда дириэктэрэ,  «Навахту.рф» бырайыагы көҕүлээччи Петр Чехордун.

«Биһиги «Навахту.рф» бырайыакпытын саҕалыыр кэммитигэр, быраактыка көрдөрбүтүнэн, биһиги хампаанньаларбыт икки көрүҥҥэ (каадыр отделын  нөҥүө бэйэлэрин күүстэринэн  үлэҕэ ылааччыларга уонна бэдэрээттэһэр тэрилтэлэрин нөҥүө) арахсаллар. Кэтээн  көрбүппүтүнэн, бастакы көрүҥ дьоно олохтоох нэһилиэнньэни үлэҕэ тардарга  ордук интэриэстээхтэр”, — диэтэ Петр Чехордун.  

Дьүүллэһии кыттыылаахтара бырамыысыланнаска  олохтоох каадырдартан үлэҕэ  уопута суохтары  ылыы механизмын дьүүллэстилэр. Дьүүллэһии түмүгүнэн бырамыысыланнас хампаанньаларын эбэһээтэлистибэтигэр  олохтоох нэһилиэнньэни үлэҕэ ылары туруорсар этиилэр хомуллуохтара. Ону таһынан  олохтоох каадырдары үлэҕэ тардарга уонна бииргэ үлэлииргэ  үтүө холобурунан АЛРОСА буолара бэлиэтэннэ.

«АЛРОСА  биһиги флагмаммытынан уонна каадырдары таһаарааччынан буолар. Билигин биһиги «олохтоох дьон бырамыысыланнас  хампаанньатыгар  үлэлиир кыахтара суох» диэн өйдөбүлү суох оҥорон, хампаанньа мунньуммут уопутун бырамыысыланнас атын тэрилтэлэригэр билиһиннэрэбит, көрдөрөбүт. Үлэ бу көрүҥэ мультипликативнай көдьүүһү ыларга, ол иһигэр олохтоох нэһилиэнньэ дохуотун үрдэтэргэ көмөлөһүөҕэ. Маныаха  АЛРОСА барыларыгар холобур буолар», –диэн П. Чехордун эбэн эттэ.

Барыллаан чахчыларынан, 2022 сылга “Бырамыысыланнаска олохтоох каадырдары” бырайыак чэрчитинэн, уопсайа өрөспүүбүлүкэҕэ олорор нэһилиэнньэттэн 12 101 киһи үлэлэннэ, ол иһигэр 6712 киһи  – 35-гэр диэри саастаах эдэр дьон.

«2022 сыл 9 ыйыгар АЛРОСА бөлөҕүн тэрилтэлэригэр Саха сиригэр олорор 3 тыһыынчаттан тахса киһи үлэҕэ ылылынна. Кинилэр – оробуочайдар уонна инженер-тиэхиньик идэлээхтэр бэрэстэбиитэллэрэ. Квалификациялара тиийбэт дьон АЛРОСА Корпоративнай университетыгар үөрэнэр кыахтаналлар. Быйыл хампаанньа үбүн суотугар 45 киһи идэҕэ эбии үөрэҕи ылла. Ону таһынан биһиги 6,8 мөлүйүөн кэриҥэ үбү нэһилиэнньэҕэ профессиональнай үөрэхтээһин, эбии үөрэтии уонна эдэр исписэлиистэри стажировкалааһын бырагыраамата олоххо киирэригэр биэрэбит”, — диэн АЛРОСА  генеральнай  дириэктэрин солбуйааччы Алексей Дьячковскай кэпсээтэ.

Кини бэлиэтээн эппитинэн, билигин атын үлэлэри сэргэ, геология комплексын исписэлиистэрэ: геодезистар, минералогтар, гидрогеологтар, геофизиктар наадалар. Бу идэлэргэ сөп түбэһэр идэлээх дьон хампаанньаҕа киирэр кыахтара үрдүк. АЛРОСА эдэр ыччакка идэни сайыннарар кыаҕы биэрэн, кинилэри үлэҕэ үөрэ-көтө ылар. 30-гар диэри саастаах дьон хампаанньаҕа 15% ылаллар. Эдэр каадырдарга көмөлөһөр хас да бырагыраама үлэлиир. Холобур, атын улуустан кэлбит уонна хампаанньа үлэлиир куоратыгар олорор сирэ суох киһиэхэ хас да сыл устатыгар уопсай дьиэ бэриллэр, инникитин бэйэтин дьиэтин атыылаһарыгар  көмө оҥоһуллар.

Саха сирэ «Олохтоох каадырдары – бырамыысылыннаска” бырайыагынан ыччаты үлэҕэ былар быраактыка Бүтүн Арассыыйатааҕы куонкуруһугар түөрт кэскиллээх бастыҥ  номинацияҕа киирдэ. Куонкурус түмүгүнэн өрөспүүбүлүкэ  «Лучшие практики по сохранению молодежного кадрового потенциала региона», «Лучшие практики сопровождения от образовательной организации до рабочего места», «Лучшие практики взаимодействия с работодателем, образовательными организациями и центрами занятости населения» номинацияларга  бэлиэтэннэ. Онтон АЛРОСА хампаанньа эдэр исписэлиис карьераҕа траекториятын оҥоруу өттүттэн биир бастыҥнарынан бэлиэтэннэ.

Хампаанньаҕа ону таһынан настаабынньык бырагыраамата уонна ис тириэньэрдэр институттара үлэлииллэр.

«Дьону үлэҕэ ыларга биһиги, бастатан туран,  исписэлиистэр быһыытынан үлэҕэ таһымнарын сыаналыыбыт. Онтон тэҥнэһии түбэлтэтигэр олохтоох каадырдарга ордук суолатын биэрэбит. Мин санаабар, бу үлэни ыытар сирбит-уоппут дьонугар чиэһинэйдик сыһыаннаһыынан буолар.  Олохтоох каадырдарга бакаансыйалар – эрэгийиэни социальнай-экэнэмиичэскэй өттүнэн өйүүр ньыма,  судургута суох усулуобуйаҕа олорор дьоҥҥо сөптөөх хамнаһы ылар уонна олоҕун таһымын үрдэтэр кыах. Бу боппуруоска биһиги  Саха сирин салалтатын кытары толору өйдөһөбүт  уонна “Бырамыысыланнаска – олохтоох каадырдары”  өрөспүүбүлүкэтээҕи бырагыраама чэрчитинэн көхтөөхтүк үлэлэһэбит”, — диэтэ Алексей Дьячковскай.

Хампаанньа үлэһиттэрэ  араас корпоративнай бырагыраамаларга кыттан, тиһигин быспакка сайдар-үүнэр кыахтаахтара кэрэхсэбиллээх.

АЛРОСА саҥа бакаансыйаларын туһунан күн аайы VK https://vk.com/alrosasakha уонна  TГ-ханаалга https://t.me/Alrosa_news, «Работа в России», «Навахту14» саайтарга иһитиннэрэр.

Виктория СЕРГЕЕВА