«АЛРОСА» көмөтүнэн үөрэнэргэ уонна сайдарга улахан кыахтаахпыт»

С.М.Аржаков аатынан дьиэ кэргэни иитиигэ көмөлөһөр Бүлүүтээҕи киин иитиллээччилэрэ АЛРОСА Хапытаалынай тутууга управлениетын үлэһиттэригэр өр сыллаах өйөбүллэрин иһин махтаннылар уонна сөҕүмэр ситиһиилэнэр туһугар өссө үчүгэйдик үөрэнэргэ эрэннэрдилэр.

Бу күннэргэ АЛРОСА Хапытаалынай тутууга управлениетын бэрэстэбиитэллэрэ Бүлүүгэ бииргэ үлэлэһэр  Дьиэ кэргэҥҥэ иитиигэ көмөлөһөр кииҥҥэ сырыттылар. Киин тулаайах оҕолорго уонна төрөппүт көрүүтэ-истиитэ суох хаалбыт оҕолору чөлүгэр түһэриигэ уонна олохтооһуҥҥа көмөлөһөр.

Киин дириэктэрэ Егор Дашевскай киин үлэтин туһунан кэпсээтэ уонна экскурсиялатта. АЛРОСА үлэһиттэригэр АЛРОСА Хапытаалынай тутууга управлениетын өйөбүлүнэн былырыын саҥа тиэхиньикэнэн сэбилэммит компьютернай кылааһы көрдөрдүлэр. Ону тэҥэ успуонсар көмөтүн үбүнэн киин сенсорнай кэбиниэккэ тэриллэри атыыласпыта, онно оҕолор уйулҕа ыгылыйыытыттан босхолоноллор.

«АЛРОСА Хапытаалынай тутууга управлениета 20 тахса сыл биһиэхэ тугунан да кэмнэммэт көмөнү оҥорор.  Успуонсардар көмөлөрүнэн биһиги утуйар куорпуһу туттубут. Ону тэҥэ сыл аайы оргтиэхиньикэни атыылаһыыга харчы көрүллэр, ол биһиги иитиллээччилэрбитигэр үөрэнэллэригэр уонна сайдалларыгар наадалаах. “Тымныы оҕонньорго сурук” диэн сыл аайы ыытыллар аахсыйаҕа кыттыыларын иһин эмиэ махтанабыт.  Бу түмүгэр оҕолор баҕарар бэлэхтэрин туталлар уонна ол бырааһынньык үтүө эйгэтин үөскэтэр. Кэлэктиип уонна иитиллээччилэр ааттарыттан АЛРОСА Хапытаалынай тутууга управлениетыгар улахан өйөбүллэрин уонна өр сыллаах бииргэ үлэлэһиилэрин иһин махтанабыт», – диэн кэпсээтэ Егор Дашевскай.

Управление дириэктэрин солбуйааччы Сергей Лаптев салалталаах   дэлэгээссийэ киин итиллээччилэрин кытта көрүстэ, ону тэҥэ төрүт бырааһынньыкка – Ыһыахха сырытта. Оҕолор ыалдьыттарга чаҕылхай айар нүөмэрдэрин көрдөрдүлэр уонна национальнай бүлүүдэлэринэн күндүлээтилэр.

“Биһиги ыалдьыттарбытыгар минньигэс национальнай бүлүүдэлэри  бэлэмнээтибит уонна бэйэбит айбыт нүөмэрдэрбитин көрдөрдүбүт. Ыалдьыттар олус астыннылар. Былырыын АЛРОСА көмөтүнэн биһиэхэ компьютер кылааһа аһыллыбыта. Олус кыраһыабай уонна аныгылыы көрүҥнээх. Билигин биһиги үчүгэйдик үөрэнэр уонна үгүһү билэр кыахтанныбыт. Маны сэргэ биһиэхэ психологы кытта дьарыктанарга сенсорнай кэбиниэт баар, манна биһиги күммүтүн туһалаахтык атаарабыт. АЛРОСА үлэһиттэрэ биһиэхэ үгүстүк кэлэн бараллар уонна кэһиилэрин аҕалаллар. Биһиги попечителлэрбитигэр көмөлөрүн уонна өйөбүллэрин иһин олус махтанабыт.  Кинилэр көмөлөрүнэн үөрэнэрбитигэр уонна сайдарбытыгар кыахпыт элбээтэ. Маннык өйөбүлүнэн өссө үчүгэйдик үөрэниэхпит уонна улахан ситиһиилэниэхпит. АЛРОСА, истиҥник махтанабыт!”, — диэтэ киин иитиллээччитэ Настя Федорова.  

Олохсуйбут үгэс быһыытынан оҕолорго фрукталары, минньигэс астары биэрдилэр уонна тэрилтэ материальнай-тэхиньиичэскэй базата тупсарыгар эбии көмөлөстүлэр.

“Оҕо дьиэтин салалтатыгар уонна үлэһиттэригэр таһаарыылаах үлэлэрин уонна олох ыарахан балаһыанньатыгар түбэспит оҕолор тустарыгар кыһамньыларын иһин ис сүрэхтэн махтанабыт. Оҕолору өйүүр, кинилэргэ дьоллоох түгэннэри бэлэхтиир кыахтаахпытыттан үөрэбит”, — диэтэ АЛРОСА Хапытаалынай тутууга управлениетын дириэктэрин солбуйааччы Сергей Лаптев.

Кини АЛРОСА Бүлүүтээҕи оҕо дьиэтин салгыы өйүөҕэ, иитиллээччилэригэр тупсаҕай усулуобуйаны тэрийиигэ көмөлөһүөҕэ диэн бэлиэтээтэ. Бу өйөбүл оҕо дьиэтин иитиллээччилэрин этэҥҥэ буолууларын уонна сайдыыларын хааччыйыыга  сүҥкэн суолталаах.

СИА