АЛРОСА кэтээн көрөр сэбиэтэ дивидент төлүүргэ сүбэлээтэ

АЛРОСА кэтээн көрөр сэбиэтэ 2023 сыл бастакы аҥаарын үлэтин түмүгүнэн хампаанньа акционердарыгар балаҕан ыйын 30 күнүгэр 27,77 млрд солк. суумаҕа дивиденнэри төлүүрүн туһунан сүбэлээтэ.

«Бу судургута суох геобэлитиичэскэй быһыыга-майгыга биһиги бүгүн АЛРОСА үчүгэй финансовай түмүктэрин көрөбүт. Быйыл бу иннинэ хампаанньа өрөспүүбүлүкэ бүддьүөтүгэр 10 млрд.-тан солкуобайы эбии көрбүтэ. Бу үп-хапчы улахан аҥаара алмаас хостонуллар улуустарыгар аттарыллыбыта. Биһиги бүгүн АЛРОСА-ны бигэ туруктаах хампаанньа диэн сыаналыыбыт», — диэтэ Ил Дархан Айсен Николаев. 

Саха сиригэр АЛРОСА дивиденнэрэ уопсайа 9,16 млрд солк. суумалаах көрүллүөҕэ. Онтон өрөспүүбүлүкэ бүддьүөтүгэр 6,94 млрд. солк., алмаас хостонуллар улуустарыгар 2,22 млрд. солк. барыаҕа.