АЛРОСА “Колодец сказок” кинигэнэн мультфильм таһаарда

АЛРОСА Экологияҕа киинэ оҕолор суруйбут остуоруйаларынан кылгас кээмэйдээх мультфильмнэр серияларын таһаарда. Онно “Колодец сказок” хомуурунньуктан айымньылар киирбиттэрэ. Премьерэтэ сотору “Саха” НКИК “Чохоон” оҕо каналыгар буолуоҕа. 

Серияҕа үс үлэ киирдэ: “Лесной доктор”, “Чудо-дерево” уонна “Лиса-грязнуля”. Кинилэр дьоруойдара тулалыыр эйгэҕэ хайдах кыһанарга уонна эйэҕэс буолар туһунан кэпсииллэр. Кинигэҕэ курдук, мультфильмнэр сахалыы, нууччалыы уонна эбэҥки тылларынан көстөллөр.

Оҥоруутугар саха сценаристара уонна артыыстара саҥардыбыт мультфильмнэрин серияларын “Чохоон” оҕо ютуб-каналыгар көрдөрүөхтэрэ: олунньу 22 күнүгэр 18.30 м “Ойуурдааҕы луохтуур” (“Лесной доктор”), кулун тутар 3 күнүгэр эмиэ бу кэмҥэ – “Аптаах мас” (“Чудо-дерево”) уонна кулун тутар 10 күнүгэр – “Чанчарык саһыл” (“Лиса-грязнуля”). Маны тэҥэ остуоруйалар анимацияларын “Саха” НКИК “Мамонт” телеканалыгар национальнай тэлэбиидэнньэнэн билсиэххэ сөп.

Санатан эттэххэ, бу 2020 сыллаахха саҕаламмыт улахан бырайыак салгыыта. Онно АЛРОСА Экологияҕа киинэ остуоруйаны ааптар ойуулардаах суруйууга куонкуруһу биллэрбитэ. Редкэллиэгийэҕэ Арассыыйаттан уонна аан дойдуттан 280 оҕо айымньытын киллэрбитэ. Хомуурунньукка 50 остуоруйа киирбитэ, онон билигин оҕолор төрөөбүт айылҕабытыгар хайдах сыһыаннаһар туһунан дьоруойдар тус холобурдарыгар көрдөрбүт мультфильмнэрин көрүөхтэрэ.

 “Биһиги бырайыакпыт сүрүн сыалынан экология өттүнэн сырдатыы уонна төрөөбүт тылы харыстааһын буолар. Хомуурунньуктарбытын ааҕааччыларбыт үгүс ахсааннаах көрдөһүүлэринэн бырайыагы салгыырга уонна үс остуоруйа матыыбынан мультфильм таһаарарга быһаарыммыппыт.  Кинигэҕэ курдук, сүрүн дьоруойдар оҕолору эйэҕэс буоларга уонна айылҕаҕа харыстабыллаахтык сыһыаннаһарга үөрэтэллэр.  Биһиги бырайыакпыт өссө биир соруга – Хоту дойду аҕыйах ахсааннаах төрүт норуоттарын ураты култуураларын өйөөһүн уонна кинилэр төрүт тылларын харыстааһын.  Ол иһин мультфильм саха тылыгар эрэ буолбакка, эбэҥки тылынан эмиэ тылбаастанна”, — диэн эттэ АЛРОСА кылаабынай эколога Полина Анисимова.

2022 сыл ахсынньы ыйыгар “Колодец сказок” хомуурунньук “Ключевое слово” Бүтүн Арассыыйатааҕы уопсастыбаннай бириэмийэҕэ “Социальнай өттүнэн эппиэтинэстээх биисинэс” анал номинацияҕа бастакы миэстэни ылбыта. Жюри АЛРОСА бырайыагын куонкуруска киирбит 200-тэн тахса үлэттэн бастыҥынан билиннэ, оттон хампаанньа Арассыыйа Федерациятын элбэх ахсааннаах тылын харыстааһыҥҥа уонна сайыннарыыга туһуламмыт бырайыактары көхтөөхтүк өйөөччүлэргэ лиидэринэн билинилиннэ.