АЛРОСА-ны кытары өрүү бииргэ

Биһиги кэлэр кэскилбитин – оҕолорбутун ким үөрэтэрэ олус суолталаах. Сунтаар улууһугар итинник санааттан учууталлары бэлэмнииргэ бэйэлэрин муниципальнай бырагырамааларын оҥордулар.

Бырагырааманы олоххо киллэрэргэ туһаныллар үп сорҕотун АЛРОСА хампаанньа биэрдэ.
Улуус баһылыга Анатолий Григорьев ону тэҥэ алмааһы хостооччулары кытары түһэрсиллибит тус сыаллаах үбүлээһин дуогабара хайдах көмөлөһөрүн туһунан кэпсээтэ.
Алмаастаах хампаанньаны кытары тус сыал­лаах үбүлээһин дуогабарынан сыл аайы Саха сирин 9 улууһа ылар 9,25 мөлү­йүөн солкуобайын АЛРОСА-тан дивиденд быһыытынан кэлэр үбү кытта тэҥнээбэккин. Ол гынан баран, биир уратылаах, улуустар уонна ал­­мааһы хостооччу икки ардыларыгар түһэрсиллибит дуогабарынан тус сыалга эрэ туһаныллар.
Дуогабардар сыл саҥатыгар түһэрсиллэллэр уонна оро­йуон былаастара АЛРОСА-ҕа отчуоттууллар. Үп туһаныллар хайысхатын АЛРОСА-ны кытары дуогабар эрэ кэнниттэн уларытыахха сөп. Ол гынан баран, быраабыла быһыытынан, ким да уларыппат. Тоҕо диэтэххэ, илии баттаныар диэри дуогабар хас да түһүмэхтээх дьүүллэһиини уонна сөбүлэһиини ааһар.

Анатолий Григорьев кэпсээ­битин курдук, 2022 сылга Сунтаар улууһа АЛРОСА-ны кытары тус сыаллаах үбүлээһин дуогабарынан ылбыт 9,25 мөлүйүөн солкуоба­йыттан «Үөрэхтээһин» муниципальнай бырагырааманы толорорго 2,25 мөлүйүөн солкуобай туттуллубут, ороскуоттар бу ыстаты­йалара саамай улаханнара. Икки мөлүйүөн солкуобайы дьаһалта уонна дьокутааттар сүөһү иитэр уонна үүнээйини олордор хаһаа­йыстыбалары өйүүргэ тыырбыттар. Өссө 2 мөлүйүөн сол­­куобай омук үгэстэрин, абыычайдарын харыстааһыҥҥа, култуураны уонна ускуустубаны сайыннарыыга бэриллибит. Чуолаан, Элгээйитээҕи уонна Сунтаардааҕы оҕо ускуустубатын оскуолаларын олохтоохтук өрөмүөннүүргэ бырайыак-симиэтэ докумуона оҥоһуллубут.
«Сунтаар спортсменнара өрөс­пүүбүлүкэҕэ эрэ буолбакка, Арассыыйа таһымыгар эмиэ киэҥник биллэллэр. Кинилэр аан дойдутааҕы саамай ааттаах-суоллаах күрэхтэһиилэргэ эмиэ кыа­­йыыны ситиспиттэрэ. Холобур, Олимпиада оонньууларын үрүҥ көмүс призера Александр Иванов, биһиги кыргыттарбыт – кик-боксиҥҥа успуорт үтүөлээх маастардара Оксана Васильева (Гюрза), Оксана Андреева уонна Мария Кривошапкина, сүүрүк Наталья Леонтьева, тустууктар Алквиад Иванов, Петр Попов, Альберт Захаров, Николай Яковлев, Лев Павлов, Николай Охлопков, волейболистка Алена Дмитриева уо.д.а.
2022 сыллаахха физичес­кэй култуураҕа уонна успуорка ситиһиилэрин иһин сыл аайы бэриллэр төлөбүрдэргэ тус сыаллаах үбүлээһин дуогабарын харчытыттан 1,5 мөлүйүөн солкуобай төлөммүтэ. Биир дойдулаах биллэр спортсменнарбыт биһиги оҕолорбутугар үтүө холобур буолаллар. Холобур, туохха дьулуһары, киһи кыайбатаҕа диэн суоҕун көрдөрөллөр. Оттон оҕолорбут успуорт күрэхтэһиилэригэр уопуту мунньуналларын туһугар өссө мөлүйүөн аҥаара суумалаах үбү өрөспүүбүлүкэ турнирдарыгар баралларыгар биэрбиппит», – диэн Анатолий Васильевич салгыы кэпсиир.
Сунтаар улууһугар элбэх урбаан­ньыты иитэр, үүннэрэр биисинэс-инкубатор үлэлиир. АЛРОСА үбүн сорҕото бастыҥ биисинэс-бырайыактары үлэлэтэргэ уонна Грант өйөбүлүгэр барар.
Улуус баһылыга бэлиэтээбитинэн, маннык дуогабар үлэ­лиир сылларыгар элбэх урбаанньыт атаҕар турда. Кинилэр сүөһү иитии­тэ, үүнээйини олордуу, бырамыысыланнас сайдалларыгар биллэр кылааттарын киллэрэл­лэр. Кинилэр улуус экэниэмикэтигэр өлүүлэрэ тиһигин быспакка ­улаатар.
Анатолий Григорьев араас эйгэҕэ бастыҥ быраактыкалары өйүүр уонна сайыннарар эрэ буол­бакка, атыттар кинилэри кытары билсэллэрин уонна кинилэргэ тардыһалларын курдук, киэҥник тарҕатыахха, сырдатыахха наадатын этэр. АЛРОСА-ны кытта дуогабар үбүн-харчытын сорҕото ити сыалга-сорукка туһаныллар.

Анатолий Григо­рьев, Сунтаар улууһун баһылыга:

– Тус сыаллаах үбүлээһин дуогабары­нан кэлэр үбү-харчыны үөрэхтээһин, култуура, успуорт, урбаан, тыа хаһаайыстыбатын уо.д.а. салаалар муниципальнай бырагыраамаларын олоххо киллэрэргэ туһанабыт.
Бастаан үлэ улуус дьаһалтатын подразделе­ниеларын иһигэр ыытыллар, ол кэнниттэн быһаа­рыллыбыт бырайыак дьокутааттар оройуоннааҕы сэбиэттэрин сиэссийэтигэр киллэриллэр. Дьокутааттар быйыл АЛРОСА-тан киирбит үп чопчу туохха туһанылларын бигэргэтэллэр. Ол кэнниттэн алмастаах хампаанньа исписэлиистэрин кытары ороскуоттары дьүүллэһэбит уонна сөбүлэһиннэрэбит.
Маннык холобуру аҕалыым: биһиги кэнники сылларга улахан болҕомтобутун учууталларбытын уонна уһуйааннар иитээччилэрин үөрэтиигэ уурабыт. Оҕолор – биһиги инники кэскилбит, кинилэр олох кырачаан саастарыттан ханнык үөрэҕи уонна үөрүйэҕи ылаллара олус суолталаах.
2022 сыллаахха биһиги алын сүһүөх кылаастар, математика, химия, физика, нуучча тылын учууталларын таһымнарын үрдэтэр кыаҕы биэрбиппит. Ол эбэтэр, биһиги кинилэри Хабаровскайга, Новосибирскайга, Санкт-Петербурга уонна Москваҕа ыыппыппыт.
Ону сэргэ Сунтаар улууһа биһиги усулуобу­йатыгар сөптөөх «Үөрэхтээһин» бырагырааманы оҥорор Казань университетын кытары дуогабар түһэрсибиппит. Онон, Казань университета биһиги учууталларбыт идэлэрин үрдэтэр биир туочукаларынан буолбута.
Бэлиэтээн эттэххэ, былырыын үбү-харчыны уталытыллыбат хаһаайыстыбаннай наадаларга туһаммыппыт. Холобур, Сиэйэ саҥа оскуо­латын тутарга сир учаастагын тыырдарарга, Туойдаахтааҕы оскуола-саады өрөмүөннээһиҥҥэ уонна тэриллэри атыылаһарга.