АЛРОСА Саха сирин норуоттарын култууратын өйүүр

Ааспыт субуотаҕа “Куруһаала” Эргиэн киинэ  Хотугу сир норуоттарын ускуустубатын  үгэс буолбут көрүҥнэрин киининэн буолла. 70-ча маастар – Саха сириттэн барытыттан омук култууратын харыстааччылар “Айар Уус” быыстапкаҕа бэйэлэрин үлэлэрин билиһиннэрдилэр.

Быыстапка кыттыылаахтара норуот маастардарын үлэлэрин көрөр эрэ буолбакка, атыылаһар кыахтаннылар. Ону таһынан кинилэр айар маастар-кылаастары уонна кэнсиэри, сынньалаҥ бырагырамаатын көрдүлэр-иһиттилэр.  Быыстапка-дьаарбаҥканы  АЛРОСА хампаанньа уонна “Симэх” ускуустуба галереята  тэрийдилэр.

 «Айар Уус” быыстапка Арассыыйа норуоттарын култуурунай нэһилиэстибэтин сылыгар ананна. Быыстапка сүрүн соругунан Саха Өрөспүүбүлүкэтин норуоттарын үгэстэрин харыстааһын уонна сайыннарыы буолар. Саха сирин маастардара бэйэлэрин дьикти үлэлэрин көрдөрдүлэр уонна кинилэр ыыппыт маастар-кылаастарыгар ким баҕалаах барыта кытынна”, — диэн АЛРОСА СӨ судаарыстыбаннай былааһын уорганнарын кытары үлэҕэ отдел начаалынньыга Ладимир Аргунов бэлиэтээн эттэ.

Тэрээһиҥҥэ СӨ култуураҕа уонна духуобунай сайдыыга  миниистирин бастакы солбуйааччы Афанасий Ноев кытынна. Кини Саха сирин норуоттарын  култууратын уонна үгэстэрин харыстааһын уонна сайыннарыы суолталааҕын бэлиэтээтэ уонна АЛРОСА  Хотугу сир аҕыйах ахсааннаах төрүт норуоттарын өйүүрүгэр болҕомтотун туһаайда.

Норуот үгэстэрин харыстааччылар быыстапкалара – Арассыыйа норуоттарын култуурунай нэһилиэстибэтин уонна САССР 100 сылларыгар Саха сирин олохтоохторугар бастыҥ бэлэҕинэн буолла.

Хотугу сир айылҕатын уонна норуоттарын култууратын харыстаан

 «Биһиги өрөспүүбүлүкэбит  норуоттара былыр-былыргыттан  бэйэлэрин дьоҕурдарынан аатыраллара. Норуот  дьоҕура үксэ кинилэр   уустук усулуобуйаҕа олорбуттарын түмүгэ этэ. Кинилэр олохторун-дьаһахтарын көрүнүөхтэрин, ыксаллаах балаһыанньаҕа туттар тэриллэрин, малларын-салларын оҥостуохтарын наада этэ. Аҕа дойду Улуу сэриитин кэмигэр биһиги өрөспүүбүлүкэбит олохтоохторо олус элбэх сылаас таҥаһы фроҥҥа ыыппыттара.

АЛРОСА экология хайысхатыгар үгүс үлэни ыытар, биһиги кинилэри кытары хардарыта бииргэ үлэлиибит. Онтон экологияҕа кыһамньыга Хотугу сир аҕыйах ахсааннаах төрүт норуоттарын үгэс буолбут олохторун укулаатын харыстааһын эмиэ киирэр”, — диэн СӨ экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Николай Додохов иһитиннэрдэ.

СӨ бырамыысыланнаска уонна геологияҕа  миниистирэ Максим Терещенко бэлиэтээбитинэн,  АЛРОСА Саха сирин экэниэмикэтигэр эрэ буолбакка, социальнай эйгэҕэ эмиэ эрэллээх тирэҕинэн буолар. Хампаанньа  биһиги күннээҕи олохпутугар кылаата улахан. Ол иһигэр, Хотугу сир аҕыйах ахсааннаах төрүт норуоттарын өйөөһүн уонна экологияҕа кыһамньы киирэллэр.

«Бу быыстапкаҕа  өрөспүүбүлүкэ маастардара кытыннылар, онон биһиги Саха сиригэр олорор норуоттар култууралрын, үгэстэрин, ускуустубаларын баайын барытын көрөр кыахтанныбыт”, — диэтэ Максим Терещенко.

Норуот куоластааһына

Маастардар, худуоһунньуктар, устуудьуйалар уонна Норуот айымньытын дьиэлэрэ, орто уонна үрдүк анал үөрэх устудьуоннара, СӨ  норуоттарын уус-уран оҥоһуктарын тэрилтэлэрэ, быыстапка кыттыылаахтарыгар бэйэлэрин үлэлэрин көрдөрдүлэр, кэпсээтилэр уонна сөхтөрдүлэр. Онтон кинилэр “прикладной ускуустуба” уонна “олохтоох оҥорон таһаарыы” номинацияларга бастыҥ маастардары быһаардылар.

“Олохтоох оҥорон таһаарыы»:

1 миэстэ – Туой арт – керамика, Дьокуускай к.;

2 миэстэ – Алёна Ганеева – бирээнньиктэри оҥоруу, Дьокуускай к.;

3 миэстэ – Багдарыын Ньургун-Сүлбэ уола – мүөт оҥоруу, Хаҥалас улууһа.

“Прикладной ускуустуба”:

1 миэстэ – Василий Данилов – маһынан оҥоһук, Дьокуускай к.;

2 миэстэ – Людмила Семенова – тигии, Мииринэй улууһа;

3 миэстэ – Анжелика Яковлева – тигии, Аллараа Халыма  улууһа.

 «Айар Ууска» тугу көрдөрдүлэр?

«Биһиги быыстапкаҕа прикладной ускуустубанан уонна олохтоох оҥоруунан дьарыктанар эрэ буолбакка, бэйэтин бородууксуйатын бренд быһыытынан көхтөөхтүк батарар маастардары түмэргэ кыһалынныбыт. Ити олус суолталаах. Саха сирэ, кырдьык,  киэн туттара элбэх – биһиги бүгүн норуот ускуустубатын араас эгэлгэтин көрдүбүт. “Симэх” ускуустуба галереятыгар, “Саха сиригэр оҥоһулунна” ассоциацияҕа махтанабыт. Хас биирдии маастар биһиги быыстапкабытыгар элбэх туһалааҕы билбитигэр, уопут атастаспытыгар, онтон маастар-кылаастар  интэриэһинэйдик ааспыттарыгар уонна  өссө элбэх киһи үгэстэргэ, национальнай оонньууларга  болҕомтотун уурбутугар эрэнэбит”, — диэн АЛРОСА Айылҕа харыстабылыгар уонна  экологияҕа киинин  Хотугу сир  аҕыйах ахсааннаах төрүт норуоттарын кытары үлэҕэ отделын начаалынньыга  Алена Дьяконова быһаарда.

 «Биһиги бүгүн норуот маастарыстыбатын дьиҥнээх бырааһынньыгын көрдүбүт. Саха сирин дьиктилээхэй үлэлэригэр  өбүгэлэрбит төрүт  үгэстэрэ уонна аныгы инновационнай хардыылар, тиэхиньикэ  бииргэ түмүллэллэр”, —  диэн прикладной ускуустуба уонна уус-уран оҥоһуктар   национальнай кииннэрин дириэктэрэ Яна Игнатьева санаатын үллэһиннэ.

Андрей ШИЛОВ