АЛРОСА социальнай бырайыактара

«Таалай күөл» эбийиэк Саха сирин бастыҥ уопсастыбаннай эйгэтинэн билинилиннэ.

Ахсынньы 3 күнүгэр Дьокуускайга архитектура уонна дизайн эйгэтигэр “Эйгэ” өрөспүүбүлүкэтээҕи бастакы бириэмийэни туттарыы сиэрэ-туома ыытылынна.
Бириэмийэиспииһэгэр кэнники биэс сыллааҕы архитектура уонна дизайн 100 бастыҥ эбийиэгэ киллэриллибит. Ол иһигэр, АЛРОСА үбүн суотугар Үүнэр көлүөнэ тус сыаллаах пуондата туппут үс улахан эбийиэгэ баар.

Үөрүүлээх биэчэргэ “Бастыҥ уопсастыбаннай эйгэ” номинацияҕа кыайыылааҕынан АЛРОСА үбүлээбит “Таалай күөл” бырайыага буолла. Бу бырайыак – уопсастыбаннай эйгэни тупсарыы саҥа көрүҥэ. Күөл тула киһи сылдьар суоллара оҥоһуллубуттар, тыылары уонна катамараннары уларсыы тэриллибит, күөх зонаҕа ыскамыайкалар уонна архитектура дьоҕус көрүҥнэрэ бааллар. Күөл сиригэр-уотугар ону таһынан урут куорат киинигэр муостаҕа турбут собо пааматынньыгын аҕалбыттар. Култуура элбэх хайысхалаах аныгы түөлбэтэ куорат олохтоохторо эрэ буолбакка, ыалдьыттара уонна туристар сөбүлээн сылдьар сирдэринэн буолла.

2011 сылтан АЛРОСА кыттыылаах Үүнэр көлүөнэ пуондата өрөспүүбүлүкэ 30 улууһугар 40 эбийиэги тутта, онтон үгүстэрэ бириэмийэ номинаннарын испииһэгэр киллэриллибиттэрэ. Холобур, “Бастыҥ социальнай бырайыак” номинацияҕа үс эбийиэк: Майа сэлиэнньэтигэр Д.Ф.Ходулов аатынан элбэх хайысхалаах култуура-сынньалаҥ комплекса, Бороҕон сэлиэнньэтигэр В.В.Никифоров-Күлүмнүүр аатынан Култуура киинэ бааллар. Ону таһынан “Куорат тупсаҕай эйгэтин оҥоруу” национальнай бырайыак чэрчитинэн олоххо киллэриллибит 11 эбийиэк “бастыҥ уопсастыбаннай эйгэ” ахсааныгар хабылынна.
«Биһиги бары билигин Саха сиригэр ханнык уларыйыылар баралларын көрө-истэ сылдьабыт. АЛРОСА инникитин даҕаны социальнай бырайыактары олоххо киллэрэргэ уонна өрөспүүбүлүкэ нэһилиэнньэтин олоҕун таһымын үрдэтэргэ көхтөөхтүк кыттар санаалаах”, — диэн АЛРОСА АК бырайыактарын салайааччы Алевтина Новикова иһитиннэрдэ.
Санатан эттэххэ, АЛРОСА өрөспүүбүлүкэ социальнай-экэнэмиичэскэй сайдыытын биир сүрүн драйверынан буолан, сыл аайы 10 миллиард солкуобай суумалаах 500-тэн тахса социальнай уонна аһымал көҕүлээһиннэри олоххо киллэрэр.
«Быйыл АЛРОСА өйөбүлүнэн Мииринэйгэ успуорт былаһаакката тутулунна, хайыһар базата аспаалланна, саҥа тутуу тротуара уоттанна. Ону таһынан чугастааҕы сылларга Оҕо дыбарыаһын уонна Доҕордоһуу дьиэтин үлэҕэ киллэрии былааннанар. Сүрүнэ, Мииринэй маастар-былаана оҥоһуллар. Биһиэхэ куораты аныгы уонна киһи кута-сүрэ тохтуур оҥорор, бырамыысыланнай туризмы сайыннарар, ону сэргэ ыччат төрөөбүт куоратыгар олохсуйа хааларга баҕарарын туһугар кинилэргэ усулуобуйаны тэрийэр сорук турар. Былаан барыта олоххо киирэригэр уонна куорат дьонун олоҕо өссө тупсаҕай, мааны буоларыгар эрэнэбин”, — диэн Мииринэй куорат баһылыга Алексей Тонких бэлиэтээн эттэ.

Саха сирин кылаабынай архитектора Ирина Алексеева санаатын үллэстибитинэн, “Эйгэ” бириэмийэ САССР 100 сылыгар куораттарга уонна сэлиэнньэлэргэ тахсыбыт уларыйыылар киэҥ хабааннаахтарын көрдөрөргө ананна. Билигин эрэгийиэҥҥэ биир кэлим былааннаах үлэ көхтөөхтүк ыытыллар, хаачыстыбалаах эбийиэктэр тутуллаллар уонна олохтоохторго тупсаҕай усулуобуйа оҥоһуллар.
«Бириэмийэни бигэргэтэргэ социальнай инфраструктура эбийиэктэригэр кэккэ номинациялары толкуйдаабыппыт. Аныгы көстүүлээх мааны дьиэлэри тутуу уонна уопсастыбаннай эйгэни оҥоруу өрөспүүбүлүкэ биир сүрүн соругунан буолар. Онуоха АЛРОСА курдук социальнай эппиэтинэстээх хампаанньалары бэлиэтиэхпин баҕарабын. Хампаанньа үбүлээһинин көмөтүнэн билигин Үүнэр көлүөнэ тус сыаллаах пуондата баар. Онтон Ил Дархан Айсен Николаев сорудаҕынан пуонда чэрчитинэн Саха сирин куоратын эйгэтин боппуруостарынан Компетенциялар кииннэрэ тэриллибитэ. “Эйгэ” бириэмийэ – кэнники сылларга биһиги холбоһуктаах үлэбит түмүгэ”, — диэн Ирина Алексеева кэпсээтэ.

Айаал АРГУНОВ суруйуутуттан тылбаас