АЛРОСА үтүө үгэстэрэ

Күрэс сайдыыта – АЛРОСА социальнай бэлиитикэтин биир сүрүн хайысхата. Култуура уонна успуорт комплексын баазатыгар үлэһиттэргэ да, нэһилиэнньэҕэ да чөл олоҕу көҕүлээһин, күрэс тэрээһиннэрин үбүлээһин, күрэс эбийиэктэрин тутуу – хампаанньа олоҕурбут үтүө үгэһин быстыбат сорҕото. “Манчаары оонньуулара” күрэс төрүт көрүҥнэрин спартакиадата да онтон туора турбата.

“Манчаары оонньууларын” бырагырааматыгар күрэс 11 көрүҥэ киирэр: хапсаҕай, мас тардыһыыта, ыстаҥа, чэпчэки атлетика, саха уонна хотугу омуктар дэгит күрэстэрэ, буулдьанан ытыы, хабылык, хаамыска, оҕунан ытыы, киирэ күрэһэ, ат сүүрдүүтэ. Аҥаардас ол да иһин бу оонньуулары саха Олимпиадата дииллэр.

Бу сырыыга хампаанньа “Манчаары оонньууларын” пуондатыгар үбүнэн көмөлөспүтүн таһынан, өссө биир интэриэһинэй бырайыагы олоххо киллэрэри өйөөтө – Таатта улууһуттан төрүттээх, көҥүл тустууга ССРС успуордун маастара Константин Константинович Луковцев сырдык аатын үйэтитэр “Олоҕун тустууттан саҕалаабыта” кинигэни таһаарарга кылаатын киллэрдэ. Кинигэ ааптара уонна эрэдээктэрэ – тустуук балта, “Таатта” хаһыат эрэдээктэрэ Анна Посельская.

Константин Луковцев саха бастакы көлүөнэ тустууктарыттан биирдэстэрэ. Кини 19 сааһыгар успуорт маастара буолбута, көҥүл тустууга Сэбиэскэй Сойууска уонна норуоттар икки ардыларынааҕы турнирдарга бириистээх миэстэлэргэ тиксибитэ. Кинигэҕэ кини доҕотторун-атастарын, үөлээннээхтэрин ахтыыта түмүллэн киирбит.

“Манчаары оонньууларын” өйөөһүн уонна Константин Луковцев туһунан кинигэни таһаарыы – бу барыта АЛРОСА өрөспүүбүлүкэ социальнай уонна успуордун олоҕор кыттыытын биир холобура. Алмаастаах хампаанньа өрөспүүбүлүкэҕэ күрэс төрүт көрүҥнэрин тиһиктээхтик өйүүр буолан, төрүт көрүҥнэр, холобур, мас тардыһыыта, норуоттар икки ардыларынааҕы таһымҥа сайдар.

АЛРОСА Култуураҕа-успуорка комплексын баазатыгар төрүт оҕунан ытыы, ыстаҥа, оттон Мииринэй уонна Удачнай куораттарга 2019 сылтан хапсаҕай дьарыктара үлэлииллэр. Ол үтүө холобурун билигин илэ көрөбүт – сиэксийэлэргэ дьарыктанааччылар бириистээх миэстэлэргэ тиксэллэр. Ол курдук, быйыл Нерюнгрига буолбут Олоҥхо ыһыаҕар төрүт оҕунан ытыы күрэҕэр 1-кы миэстэни Мииринэй куоракка анал сиэксийэҕэ дьарыктанар Юна Марова ылла. Тааттаҕа “Манчаары оонньууларыгар” кыттар Мииринэй сүүмэрдэммит хамаандатын кыттыылаахтара чэпчэки атлетикаҕа, ыстаҥаҕа, оҕунан ытыыга, хапсаҕайга, дэгит күрэскэ уонна мас тардыһыыга АЛРОСА успуорт эбийиэктэригэр дьарыктаннылар.

Бэлиэтээн эттэххэ, “Манчаары оонньууларыгар” кыттар алмаастаах түөлбэ тоҕус улууһун сүүмэрдэммит хамаандалара бука бары хампаанньа улуустар социальнай-экэнэмиичэскэй сайдыыларыгар көрөр үбүн көмөтүнэн эрчиллэллэр.

АЛРОСА Саха сиригэр социальнай эбийиэктэри тутууну уонна саҥардан оҥорууну аҥаардас өрөспүүбүлүкэҕэ төлүүр нолуогунан уонна дивиденинэн эрэ буолбакка, Үүнэр көлүөнэ тус сыаллаах пуондатын нөҥүө эмиэ мэлдьи өйүүр. Ол чэрчитинэн, баара-суоҕа аҕыйах сыл иһигэр Дьокуускайга Саахымат-дуобат өрөспүүбүлүкэтээҕи киинэ, Амма Бөтүҥэр Күрэс адаптивнай көрүҥнэригэр аналлаах күрэс саалата, Үөһээ Халыма Зярынкатыгар Култуура-успуорт комплекса тутуллан үлэҕэ киирдилэр.

Быйыл от ыйын саҥатыгар Мииринэйгэ “Кимберлит” күрэс комплексыгар Мииринэй улууһун 60, Мииринэй куорат төрүттэммитэ уонна алмаас бырамыысыланнаһа саҕаламмыта 70 сылларыгар анаммыт, Александр Федотов кэриэһигэр Бүтүн Арассыыйатааҕы буокса турнира буолан ааспыта. Ол түмүгүнэн, сэттэ саха боксера Арассыыйа Чөмпүйэнээтигэр кыттар путевканы туппута.

Итини сэргэ быйыл хампаанньа табаһыттар күрэс оонньууларын, Үөһээ Бүлүү улууһун уонна Мииринэй оройуонун ыһыахтарын күрэхтэһиилэрин өйөөбүтэ.

Ол курдук, алмаастаах хампаанньа көмөтүнэн Саха сиригэр эт-хаан култууратынан уонна күрэһинэн дьарыктанар усулуобуйа тупсар, саҥа чөмпүйүөн буолуохтаах ыччат дьон үүнэн тахсар. Төһө даҕаны уустук кэм бүрүүкээн, омук дойдуларын сааҥсыйалара адаҕайан турдаллар, алмаас эйгэтигэр уустуктар үөскээтэллэр, АЛРОСА хампаанньа бэйэлээх бэйэтин Сахатын сиригэр социальнай соругун толоро олорор, ол иһигэр успуорт эйгэтигэр эмиэ.

Андрей Шилов, «Кыым» хаһыат саайтыттан