Алта сабыллыбыт аэропорка үлэһиттэри көрдөөн эрэллэр

Арассыыйа соҕуруу өттүгэр баар 10 сабыллыбыт аэропортан алтатыгар сөмөлүөттэри уонна айан дьонун көрөр-истэр исписэлиистэри көрдөөн эрэллэр.

Барыта 150-тан тахса вакансияны таһаарбыттар, диэн иһитиннэрэр RB.RU. саайт.

Краснодар, Сочи уонна Анапа аэропортарын дьаһайар «Аэродинамика» хампаанньа 119 вакансияны таһаарда. Итинтэн 46-та Краснодар аэропордугар, 15-һэ Анапа аэропордугар сыһыаннаахтар. Испииһэккэ видеонан кэтээн көрөр эпэрээтэр, доруобуйалара хааччахтаах айан дьонун арыаллыыр агент, харабыллыыр уонна ситэрэн бэрэбиэркэлиир иниспиэктэр, диспетчер, мэдисиинискэй үлэһиттэр уонна да атыттар бааллар.

Геленджик аэропорда 11 вакансияны таһаарбыт. Испииһэккэ диспетчер, баһаарынай массыына суоппара, түргэнник дьаһанар уонна оперативнай салайыы бөлөҕүн иниспиэктэрэ, харабыл киирбиттэр.

Маны тэҥэ үлэһиттэри Ростов-на-Дону (25 вакансия), Симферополь (23 вакансия), Воронеж (18 вакансия) аэропортара көрдүүллэр.