Алта уон сыллаах АТК уонна саҥа тэриллибит АТП

Сарсыарда 7.45 чааска Сунтаар устун икки оптуобус маршрутунан айанын саҕалыыр. Бу күһүҥҥүттэн улуус дьаһалтатын ɵйɵбүлүнэн элбэх оҕолоох ыалларга босхо сырыы билиэтэ кытта үлэлиир. Күнү саҕалыыр оптуобуска дьон тоҕуоруһа олорон, туран айанныыр буоллаҕына 9 чаас ааһыыта биэстии-алталыы киһи сылдьар. Суоппардар Алексей Филиппов (ПМК-Химия) уонна Владимир Егоров (Хомустаах-Бартыһаан) икки маршрутунан анаммыт болдьохторунан быыстала суох сылдьаллар.

Алексей Филиппов: «Дьон олус үɵрэр, бэл диэтэр оптуобуска сэттэ сыл буолан баран кɵрсүбүт дьоннор кытта бааллар, сүрүнэ болдьоҕун кɵтүппэккэ үлэлиэххэ наада, оптуобустар саҥалар, ол иһин үчүгэй!», — диэн санаатын үллэстэр.  Урукку кэмҥэ АТК, онтон МУП АТП нэһилиэнньэ дьонун оптуобуһунан таһара уонна ɵр кэмҥэ Сергей Вихман олус бэриниилээхтик үлэлээбитэ. Түгэнинэн туһанан кинилэргэ улахан махтал! Билигин тэрилтэ саҥардыллан МАУ АТП диэн буолла, бу саас биэс саҥа оптуобус кэлэн олус бэрт. Ханнык эрэ кэмҥэ отой тохтуу сылдьыбыт оптуобус сырыыта, билигин сɵргүтүллэн нэһилиэнньэ үɵрүүтэ үгүс. Саҥалыы тыынынан үлэлиир тэрилтэ 5 үлэһиттээх, дьоҥҥо табыгастаах сырыыны олохтуур сыаллаах арааһы тобулар.

Салайааччы Элина Яковлева этэринэн: «Оптуобуһу быыстала суох сүүрдэбит, сотору «Алмазэргиэнбаан» тэрилтэни кытта үлэлэһэн тырааныспар каартатын оҥоруохпут, ону кытта элбэх оҕолоох ыаллар босхо сылдьалларыгар өрөспүүбүлүкэттэн ɵйɵбүл баар буолуоҕа».

Уруккуну сэгэтэн кɵрдɵххɵ, оптуобус сырыытынан үлэлээбит «Автотранспортнай колонна» тэриллибитэ быйыл 60 сыла. Ол бэлиэ түгэни бэлиэтээн ЖКС тэрилтэҕэ урукку уонна билиҥҥи үлэһиттэр кɵрсɵн билистилэр. 1996-2009 сыллаахха диэри АТК-ны салайбыт Сунтаар нэһилиэгин бочуоттаах олохтооҕо Людмила Георгиевна Сергеева (Петрова) үлэһиттэрин кытта билиҥээҥҥи диэри чугастык билсэн, эн-мин дэһэн, биэс сыл буола-буола үбүлүɵйбүтүн бэйэбит бэлиэтиир үтүɵ үгэстээхпит диир. Тэрилтэ тɵрүттэммит кэмиттэн билигин аттыбытыгар баар дьоннор бэһиэлэр: суоппардар Иван Петрович Егоров, Николай Константинович Васильев, Афанасий Петрович Васильев, Зоя Алексеевна Бельчусова уонна Людмила Георгиевна Сергеева. Бу кɵрсүһүүгэ кырдьаҕас суоппардартан биирдэстэрэ 86 саастаах Үлэ бэтэрээнэ, Сϴ Норуотун хаһаайыстыбатын үтүɵлээх үлэһитэ Уйбаан Дьɵгүɵрэп кэлэн сэһэргэстэ.

Урукку билиҥҥи үлэһиттэр кɵрсүһүүлэрин үтүɵ түгэнэ бэтэрээн үлэһиттэри Уйбааннаах Людмиланы Сунтаар устун оптуобуһунан хатааһылаттылар. Онно биһиги устар бɵлɵх соспой уопсан сып-сылаас, ып-ыраас оптуобуһунан үлэбитигэр кэллибит.

Тускулаана ГОРОХОВА-КОБЕЛЬЯНОВА