Алтынньы 3-4 күннэригэр Саха тыйаатыра Москваҕа испэктээктэрин көрдөрүөҕэ

Былатыан Ойуунускай аатынан Саха академическай тыйаатыра алтынньы 3 уонна 4 күннэригэр Москва куоракка Маалай тыйаатырга «Алитет хайаҕа күрүүр» уонна «Илиир хоруол» диэн бастыҥ испэктээктэрин көрдөрүөҕэ.

Тыйаатыр духуобунай киин буоларын быhыытынан норуоту сомоҕолуур, тутахсыйбыт кэмҥэ саҥа санааны угар, дьалхаан бириэмэтигэр ис туругу бөҕөргөтөр аналлаах. Билиҥҥи кэмҥэ саха дьоно түмсэн, сирэй көрсөн, санаа атастаhан, бэйэ-бэйэҕэ чугас буоларбыт ирдэнэр.

Саха тыйаатырын кэлэктиибэ Москваҕа олорор Саха сириттэн төрүттээх дьону алтынньы 3 уонна 4 күннэригэр киэhэ 19:00 чаастан улахан түhүлгэҕэ ыҥырар.

Билиэттэр Маалай тыйаатыр каассатыгар уонна онлайн атыыланаллар:

— Т.Семушкин «Алитет хайаҕа күрүүр», алтынньы 3 күнүгэр 19:00 чаастан: http://www.maly.ru/spectacle/view?name=saha_alitet

— У.Шекспир «Илиир хоруол», алтынньы 4 күнүгэр   19:00 чаастан: http://www.maly.ru/spectacle/view?name=saha_lir

Пушкин картатынан 14-22 саастаах ыччат босхо сылдьыан сөп.