Алтынньыга «Айхал» сахалыы саҥа криминальнай драма сүрэхтэниэ

Алтынньы 2 күнүгэр Саха сирин киинэ тыйаатырдарыгар «Айхал» криминальнай драма киэҥ экрааҥҥа тахсыаҕа.

Бу — саха киинэтин устуоруйатыгар тыа сирин баандаларын туһунан аһаҕастык уонна киэргэппэккэ кэпсиир бастакы хартыына. Киинэ дьиҥнээх олоххо буолбут түбэлтэлэргэ олоҕурар уонна өрөспүүбүлүкэҕэ урут устуллубатах тиэмэни көтөҕөр.

«Абааһылаах хаус» хартыынатынан номнуо биллэр режиссер уонна артыыс Дьулусхан Андросов саҥа үлэтигэр өрөспүүбүлүкэ ыраах нэһилиэктэрин хаппыт саха бандьыыт бөлөхтөрүн тиэмэтин көтөхпүт.

Сюжет 2008 сыллаахха буолбут дьиҥнээх түбэлтэлэргэ олоҕурар. Ол эрээри киинэҕэ буолбут сирэ-дойдута уонна кэмэ-кэрдиитэ чуолкай ааттаммат. Кини этэринэн, сценарий хас да дьиҥнээх олох устуоруйатыгар олоҕуран суруллубут. Олору биир драматическай кэпсээҥҥэ холбообуттар, оттон матырыйаалы бу түбэлтэлэри илэ көрбүт дьону уонна кыттыылаахтары кытта бииргэ хомуйбуттар.