Алтынньыга эбии 20 км уһуннаах суол өрөмүөннэннэ

Алтынньы ыйга Саха сиригэр өссө 20 км уһуннаах эрэгийиэннээҕи суолталаах суол өрөмүөнэ түмүктэннэ. Бу туһунан Саха сирин СӨ Суолларын управлениетыгар иһитиннэрдилэр. Үлэлэр Арассыыйа Бэрэсидьиэнэ Владимир Путин көҕүлээһининэн олоххо киирэр «Олоххо аналлаах инфраструктура» национальнай бырайыак чэрчитинэн «Амма», «Умнас» уонна «Өймөкөөн» трассаларга ыытылыннылар.

«2025 сыл тоҕус ыйын түмүгүнэн, уопсайа 66,7 км уһуннаах өрөспүүбүлүкэтээҕи суолталаах суоллар учаастактарын өрөмүөнэ уонна саҥардан оҥоруута түмүктэннэ», – диэн биэдэмистибэҕэ кэпсээтилэр.

Сүрүн үлэлэр «Нам», «Кэбээйи», «Харбалаах» уонна «Бөтүҥ» трассаларыгар ыытылыннылар. Хантараак чэрчитинэн Хаҥалас түөлбэҕэ киирэр суол уонна «Мүрү»  суол саҥардылыннылар, онно тротуардар уонна уулусса сырдатыыта оҥоһулуннулар. Ону таһынан, Өлүөхүмэ уонна Сунтаар улуустарыгар, ону тэҥэ Улахан-Харыйалаах өрүстэри туоруур үс күргэ  нуормаҕа сөп түбэһэр турукка киллэрилиннилэр.

Үлэҕэ киирбит тутуулар уопсай уһуннара 225 погоннай миэтэрэ буолла. Онон, алтынньы ый иккис дэкээдэтигэр 86 км тахса эрэгийиэннээҕи суол нуормаҕа сөп түбэһэр турукка киллэрилиннэ. Уопсайынан, быйылгы тутуу кэмигэр 109 км  эрэгийиэннээҕи уонна муниципалитеттар икки ардыларынааҕы суолталаах суоллары, ону таһынан 249 погоннай миэтэрэ усталаах күргэ  нуормаҕa сөп түбэһэр турукка киллэрэргэ былааннанар.