Алтынньыга ханнык сокуоннар олоххо киирэллэрий?

Байыаннайдарга уонна судаарыстыбаннай сулууспалаахтарга хамнастарын үрдэтиэхтэрэ, дьоҕус уонна орто биисинэс бас билээччилэрэ кирэдьииккэ болдьоҕу көһөрүүнү ылар кыахтаныахтара, о.д.а.

Кирэдьииккэ болдьоҕу көһөрүү

Маны бэйэ дьарыктаах дьон, ону таһынан дьоҕус уонна орто биисинэс бас билээччилэрэ биэс сылга биирдэ, алта ыйтан ордуга суох болдьоххо ылыахтарын сөп. Сүрүн ирдэбил — кирэдьиит 2024 сыл кулун тутар 1 күнүттэн оҥоһуллубут буолуохтаах уонна кээмэйэ мантан улахана суох буолуохтаах:

• 10 мөл. солк. — бэйэ дьарыктаах дьоҥҥо;
• 60 мөл. солк. — микро-тэрилтэлэргэ;
• 400 мөл. солк. — кыра тэрилтэлэргэ;
• 1 мөл. солк. — орто тэрилтэлэргэ.

Байыаннай сулууспалаахтар уонна судаарыстыба үлэһиттэрин хамнастара үрдүөҕэ

Кинилэр хамнастарын 7,6% үрдэтиэхтэрэ. Харчынан хааччыллыы индексацияланыаҕа — холобур, ыҥырыынан эбэтэр хантараагынан сулууспалыыр байыаннайдарга, национальнай гвардияҕа сулууспалыыр уонна полиция анал сыбаанньалаах дьоҥҥо. Үрдэтии ону таһынан сорох күүстээх структуралар үлэһиттэрин уонна федеральнай казеннай, бүддьүөт уонна аптаныамыйалаах тэрилтэлэр үлэһиттэрин таарыйыаҕа. Ону таһынан, байыаннай биэнсийэлээхтэр уонна  биэдэмистибэлэр урукку үлэһиттэрин биэнсийэлэрин 7,6% улаатыннарыахтара.

Судаарыстыбаннай микрофинансовай тэрилтэлэр ипотека биэрэр кыахтаныахтара

Алтынньы 22 күнүттэн ипотека кирэдьиити баантан эрэ буолбакка,  судаарыстыбаннай микрофинансовай тэрилтэттэн ылар кыаллыаҕа. Кирэдьииттэр субъекка үлэлиир судаарыстыба өйөбүлүн бырагыраамаларынан эрэ бэриллиэхтэрэ. Маннык хампаанньалар үлэлэрин уонна кирэдьиит усулуобуйаларын Арассыыйа Киин баана кэтиэҕэ.

Түөкүттэри утары саҥа миэрэлэр

Улахан бааннар сыһыарыыларыгар анал «кнопка» баар буолуоҕа — кини көмөтүнэн түөкүттэргэ харчыны ыыппыт туһунан иһитиннэриэххэ сөп. Ону таһынан, үп-харчы тэрилтэлэрэ маннык эпэрээссийэ туһунан электроннай ыспыраапканы биэриэхтэрэ — килийиэн полицияҕа сайабылыанньа суруйарыгар.

Доброволецтарга байыаннай сыбаанньаны ылаллара судургу буолуоҕа

Саппааска сылдьар уонна бэйэ баҕатынан хантараагынан сулууспалыыр эбэтэр урут сулууспалаабыт гражданнарга билигин байыаннай сэбиэттэри эбэтэр аттестацияны ааспакка эрэ байыаннай сыбаанньалары иҥэриэхтэрин сөп.