Алыптаах мааска абылыыр…

«Бастатан туран, артыыстар таһымнара үрдүгүн бэлиэтээн этиэхпин баҕарабын. Бука бары профессиональнай артыыстартан туох да уратыта суох оонньуугут. Алампа кэрэкэ тыллара, ураты этиилэрэ бииртэн-биир кутулла турда, уобарастар арылхайдык, толору арылыннылар. Динислам Тууйас режиссердаах «Олох дьэбэрэтэ» уонна ааспыт сыллааҕы «Таптал» драмалара олус күүстээх, таһыччы үчүгэй туруоруулар. Атын испэктээктэргэ диалогу оҥоруу остуолга олорон кэпсэтии буоллаҕына, кини хас биирдии хартыыната олус ураты, көрүөххэ интэриэһинэй, киһини толкуйдатар өрүттээхтэр. Ол эрээри, испэктээк чиҥ түмүктээх буолуохтаах. Манан тугу этиэн баҕарара көстүөхтээх. Ол суох…» — диэн «Алыптаах мааска» бэстибээл дьүүллүүр сүбэтэ Владимир Николаев аатынан Сунтаардааҕы норуот тыйаатырын туруоруутун сыаналаата.

Билиҥҥи көрөөччү урукку кэмҥэ холоотоххо, атын. Киниэхэ бэлэми ыстаан биэрэр табыгаһа суох. Бэйэтэ толкуйдаан тобулан, ырытан көрөн, элбэхтик мөккүһэн түмүгү оҥорор толору кыахтаах уонна сөбүлүүр даҕаны. Онон маннык туруоруулар норуот тыйаатырдарыгар тоҕоостоох дии саныыбын. Тыйаатыр дириэктэрэ Екатерина Григорьева көрөөччүнү соһутар, аныгы испэктээги бэлэхтиир уонна тыйаатыр үлэтигэр саҥа сүүрээни киллэрэр туһугар Динислам Тууйаһы ыҥыран, номнуо үс испэктээк турда.

А.И.Софронов — Алампа «Олох дьэбэрэтэ» драматын дьүһүйүүгэ анал театральнай үөрэҕэ суох, араас эйгэ үлэһиттэрэ кыттыыны ыллылар. Биллэн турар, испэктээги туруоруу элбэх сыраны-сылбаны эрэйэр. Маныаха искусство алыптаах эйгэтигэр куттарын туттарбыт дьон тугу барытын умнан туран, үлэни-үөрэҕи тохтотон, дьиэ кэргэни, дьиэтээҕи үлэни хаалларан тыйаатыр кистэлэҥин арыйаллар.

Оруоллары толордулар:

Маайа — костюмер Сардаана Контогорова.
Уйбаан — учуутал Семен Васильев.
Баһылай — урбаанньыт Ефрем Афанасьев.
Алааппыйа — төрүт култуура уһуйааччыта Туйаара Алексеева.
Даайыс — корреспондент Ньургуйаана Харчасова.
Отчут уол — видеограф Герман Иванов.

Маннык аҕыйах киһилээх испэктээги, ааспыт нэдиэлэҕэ Саха тыйаатырын дьоҕус саалатыгар уонна «Алыптаах мааска»  өрөспүүбүлүкэтээҕи  бэстибээлгэ көрдөрдүлэр. Көрөөччү, дьүүллүүр сүбэ биһирэбилин ыллылар. Быйыл иккис сылын «ЛУЧШИЙ ЭКСПЕРИМЕНТ» анал аат хаһаайыттарынан буоллулар уонна сүрүн дьоруой Сардаана Контогорова «БАСТЫҤ ДЬАХТАР ОРУОЛУН» ылла.

Сунтаартан саҕыллан тахсыбыт «Алыптаах мааска» бэстибээл  өрөспүүбүлүкэ норуотун тыйаатырдарын икки ардыларыгар саамай улахан күрэс түһүлгэтинэн уонна артыыстарга олус кэтэһиилээх түгэнинэн буолар. Быйылгы бэстибээл тоҕус томтордоох Чурапчы улууһугар 15 норуот тыйаатырын, 205 артыыһы хабан үлэ барда.

Ньургуйаана Харчасова