Амма бөҕөһө Георгий Окороков Австралия чөмпүйүөнэ буолла

Амма улууһуттан төрүттээх бөҕөс Георгий Окороков көҥүл тустууга Австралия национальнай чөмпүйэнээтин кыайда.

26 саастаах тустуук Георгий Окороков ааспыт сылга Австралия аатыттан норуоттар икки ардыларынааҕы күрэхтэһиилэргэ кыттар туһунан докумуоннары оҥотторбута. Онон ааспыт сылга кини бу дойду аатыттан аан дойду чөмпүйэнээтигэр кыттыбыта.

Георгий Амма улууһун Болугур нэһилиэгиттэн төрүттээх. Норуоттар икки ардыларынааҕы кылаастаах успуорт маастара, 2015 сыллаахха юниордарга Европаҕа бастыыр иһин күрэхтэһии кыайыылааҕа, 2016, 2016 сылларга Арассыыйаҕа бастыыр иһин күрэхтэһиигэ үрүҥ көмүс уонна боруонса призер буолары ситиспитэ. Кини 2020 сыллаахха Уһук Илин чөмпүйэнээтин кыайбыта.