Амма Бөтүҥүн тыыл бэтэрээннэрин Өйдөбүнньүк аккырыыкка оҥорон үйэтиттилэр

Бу күннэргэ өрөспүүбүлүкэ улуустарын Землячестволара ааспыт сыллааҕы үлэлэрин түмүгүн таһаарар тэрээһиннэри ыыталлар.

Ааспыт нэдиэлэ бүтүүтүгэр сыл аайы ыытыллар үгэс буолбут көрсүһүүнү Амма улууһуттан төрүттээх дьон тэрийэн ыыттылар. Онно нэһилиэктэр баһылыктара уопсастыбынньыктарын кытта кэлэн, бэйэлэрин биир дойдулаахтарын, устудьуоннары кытта көрсө санааларын атастастылар, бииргэ үлэлээһин былааннарын торумнаатылар. Олус түмсүүлээх биир дойдулаахтар түмсүүлэринэн Бөтүҥ нэһилиэгин землячествота буолар. Өр кэмҥэ бу түмсүүнү педагог идэлээх уйулҕа үлэһитэ Тамара Егорова салайар. Былырыын бөтүҥнэр Улуу Кыайыы 80 сылыгар бэрт үгүс үлэни тэрийэн ыыппыттара. Ол үлэ түмүгүнэн бу күннэргэ А.С. Пушкин аатынан национальнай бибилэтиэкэ историческай саалатыгар ааспыт сыллааҕы үлэ түмүгүнэн «төгүрүк остуол» буолан ааста. Манна учуонайтан саҕалаан, норуот хаһаайыстыбатын үлэһиттэрэ, үлэ бэтэрээннэрэ — киин куоракка олохсуйан олорор Амма улууһун Бөтүҥ нэһилиэгин киэн туттар дьоно кэлэн кыттыыны ыллылар.

 

Бу нэһилиэк землячествотын салайааччыта Тамара Егорова ытык бэтэрээннэригэр ураты болҕомтону ууран, араас дириҥ ис хоһоонноох тэрээһиннэри ыытар. Ол курдук, Бөтүҥ бэтэрээннэрэ Улуу Кыайыы 80 сылынан сибэстээн, былырыын өрөспүүбүлүкэ бары нэһилиэктэригэр холобур буолар үлэни — кыайыыны уһансыбыт бэйэлэрин төрөппүттэригэр анаммыт өҥнөөх Ахтыы аккырыыккатын матырыйаалларын хомуйан, анаан үйэтиппиттэрэ.

— Бу аккырыыккабыт хомуурунньугун былырыын төрөөбүт Бөтүҥмүтүгэр тиийэн, Светлана Николаева аатынан Ийэ искибиэригэр олоҥхоһут Екатерина Иванова олбоҕор Улуу Кыайыыны тыылга үлэлэринэн уһансыбыт төрөппүттэрбитигэр, эһэлэрбитигэр, эбэлэрбитигэр — тыыл бэтэрээннэригэр анаан сүрэхтээбиппит. 

 

 

 

Көстөрүн курдук, бэрт улахан үлэ ыытыллыбыта. Ыал аайы эдэрдиин-эмэнниин дьиэ кэргэн альбом-архыыптарын хасыһыы саҕаламмыта, эргэ хаартыскалары хомуйуу буолбута. Быһата, былыргы хаартыскалар дьиэ кэргэни биир тыыннаабыттара, төрүччүнү үөрэтиигэ угуйбуттара. Ытык саастаах оҕонньоттор, эмээхситтэр эдэр саастарын санаан, бэрт үгүс историческай чахчы сөргүтүллүбүтэ, умнулла быһыытыйан эрэр үгүс ахтыы нэһилиэкпит устуоруйатын дириҥник үөрэтиигэ көҕүлээбитэ. Эргэрбит, кырыылара хатан тостубут хаартыскалары саҥардан, ытык дьоммут эдэр саастарын  эргитэн, кинилэри бу тыыннаахтыы оччотооҥҥу сэрии инниннээҕи уонна кэнниннээҕи кэмнэригэр түһэрбитэ, удьуор тыынын уһугуннарбыта. Бу аккырыыкка хомуурунньуга улахан иитэр-үөрэтэр дириҥ ис хоһоонноох. Ол курдук, уһуйааннартан саҕалаан, оскуола оҕолоругар ыытыллар араас тэрээһиннэргэ, кылаас чаастарыгар туттуллуоҕа, төрүччүнү үөрэтиигэ, билиигэ уһуйуоҕа. Аккырыыкка хомуурунньугун нөҥүө оҕо кимтэн кииннээҕин, хантан хааннааҕын билиэҕэ, — диэн бэлиэтээтэ бырайыак ааптара, Бөтүҥ нэһилиэгин түмсүүтүн салайааччыта Тамара Егорова.

Тамара Егорова биир дойдулаахтар түмсүүлэрин ыытар үлэтигэр көхтөөх кыттыыларыгар махтанан туран, Улуу Кыайыы 80 сылыгар ананан тахсыбыт умнуллубат үйэлээх өйдөбүнньүгү — өҥнөөх  Аккырыыкка хомуурунньугун Дьокуускай куоракка олорор Амма улууһун Бөтүҥ нэһилиэгиттэн төрүттээх ытык дьоҥҥо туттарда.

Амма Бөтүгүн Землячествотын бэртээхэй холобура батыһыннарыылаах буолара буоллар.  Бу, дьиҥэр, кыаллар суол эбээт. Ытык дьоммутун — тыыл бэтэрээннэрин үйэтитэр Аккырыыкка хомуурунньуга ыал аайы баарын ситиһиэххэ.