Амма Эмиһигэр ойуур баһаарыттан сэрэтэр үлэ барар

Баһаары бохсууга анаммыт 123 №-дээх федеральнай сокуон чэрчитинэн ирдэбил быһыытынан  хас биирдии нэһилиэккэ ойуур баһаарыттан сэрэтэр минерализованнай балаһа баар буолуохтаах.

Бу күннэргэ Амма улууһун Эмис нэһилиэгэр ыытыллар үлэ туһунан баһылык Прокопий Бубякин иһитиннэрэр:

— Киин куораттан тырахтарыыстары кэпсэтэн, анаан булууктаах гусеничнай тыраахтарынан минерализованнай балаһаны нэһилиэк тулатыгар тартардыбыт.

Ойуур баһаара нэһилиэнньэлээх пууҥҥа суоһуур түгэнигэр аһаҕас уоту бопсор инниттэн минерализованнай балаһа олус суолталааҕын өйдүүр наада.

Баһаартан сэрэхтээх буолууга үлэни салгыы ыытабыт.

Куйаас күннэр тураннар, быйылгы сайын өссө да уһуур чинчилээх. Онон нэһилиэк тула минерализованнай балаһаны оҥоруу – бүгүҥҥү күн ирдэбилэ.