Амма Эмиһигэр саҥа киин тутулунна

Бэҕэһээ, ахсынньы  16 күнүгэр,  Амма улууһун  Эмис нэһилиэгэр Е.А.Захарова-Саха Күөрэгэйэ аатынан элбэх функциялаах култуура киинэ үөрүүлээх быһыыга-майгыга аһылынна.

Олохтоохтору уонна ыалдьыттары үөрүүлээх түгэнинэн СӨ култууратын уонна духуобунай сайдыытын миниистирин солбуйааччы Афанасий Ноев, Амма улууһун баһылыга Степан Кузьмин уонна Эмис баһылыга Прокопий Бубякин эҕэрдэлээтилэр.

«Эбийиэги тутуу өссө   2013 сыллаахха «Мин Сахам сирэ   ХХI үйэҕэ» үтүө дьыала хамсааһын иитинэн саҕаламмыта. Бу үөрүүлээх уонна кэтэһиилээх  түгэнинэн барыгытын эҕэрдэлиибин», — диэтэ Степан Кузьмин.

Саҥа кииҥҥэ нэһилиэк дьаһалтата, библиотека, Култуура киинэ баар буолуоҕа. Тутуу уопсайа  31 мөл. 500 тыһ. солк. суумалаах. Мантан судаарыстыбаннай бүддьүөт харчыта 15 мөл. 750 тыһ. солк.