Амма Эмиһин сис ыала Тимофеевтартан киин куорат кытта киэркэйбиккэ дылы буолла…

Дьокуускай киин уулуссаларыгар сыл аайы кулун тутар 5 күнүгэр — Норуот маастарын күнүгэр сахалыы таҥастаах дьону көрөн хараххын сымнатаҕын.

Бүгүн эмиэ саха таҥастаах дьон аныгы дьон сиэринэн суотабайдарын көрө туралларыгар түбэһэн, кэпсэтэргэ сананным.

Бу Амма улууһун Эмис нэһилиэгин аҕыс оҕолоох дьоллоох ыала Тимофеевтар эбит. Кинилэр бүгүҥҥү бэлиэ күн туһунан санааларын үллэһиннилэр.

— Улуу Кыайыы 80 сылыгар бэлэмнэнэн, бүгүн анаан кэлэн, сэлэлээн хаамыыга улууспут чиэһин көмүскээн кыттыыны ыллыбыт. Биһиги өбүгэ үгэһин үйэтитэ сылдьар элбэх оҕолоох Эмис нэһилиэгин сис ыалабыт. Бэйэбитин көрдөрө, дьону көрө сылдьабыт. Бу «Чуумпу Бүлүү» диэн испэктээххэ кыттарбытыгар анаан тиктибит кыһыҥҥы таҥаспыт. Маннык үөрүүлээх дьоро тэрээһиннэргэ кэтэргэ бэртээхэй таҥас эбит диэн үөрэн турабыт, — диэн санаатын үллэһиннэ дьоллоох ыал ийэтэ  Матрена Тимофеева.

Кырдьык да, саха дьоно маннык кыһыҥҥы таҥаһы кэтэ сырыттахтарына, бэл, куораппыт кытта киэркэйэ түһэргэ дылы эбит. Хаһан бары кыһын маннык сахалыы таҥнар буолабыт?…