Амма мүөтэ норуоттар икки ардыларынааҕы куонкуруска үрдүк наҕараадаҕа тигистэ

Бу күннэргэ Уфа куоракка «Api Global2025» норуоттар икки ардыларынааҕы куонкурус түмүгэ таҕыста.

Амма улууһун Мээндиги сэлиэнньэтиттэн урбаанньыт Марат Залялов хомуйбут мүөтэ Уфа куоракка ыытыллыбыт «Api Global2025» норуоттар икки ардыларынааҕы куонкуруска «Полифлерный мед» номинацияҕа иккис миэстэҕэ тигистэ. Бу номинацияҕа 23 кыттааччы кииристэ, диэн СӨ Ил Дарханын уонна Бырабыыталыстыбатын пресс-сулууспата суруйар.

Куонкуруска Арассыыйа 39 эрэгийиэниттэн уонна чугастааҕы тас дойдулартан барыта 266 мүөт көрүҥэ көрүллүбүт. Оттон Саха сириттэн араас улуустартан мүөт биэс көрүҥэ хомуллан ыытыллыбыт.

«Мин тэрээһиҥҥэ иккис төгүлүн кыттабын. Сүрүнэ диэн пуорум кэмигэр бырагыраама таһынан ханнык баҕарар ыйытыыны биэриэххэ уонна хоруйу ылыахха сөп. Хас биирдии эрэгийиэн мүөтэ састаабынан уратылардаах. Ол иһигэр Саха сирин мүөтэ эмиэ туспа састааптаах. Бу мүөт кылгас сайыммыт устата хомуллан, бары өттүнэн олус туһалаах», — диэн Марат Залялов санаатын үллэстэр.

Санаттахха, былырыын күһүн Горнай улууһуттан урбаанньыт Илья Осипов хомуйбут мүөтэ «Сибиир бастыҥ мүөтэ» куонкуруска иккис миэстэни ылбыта, кэлин «Көмүс күһүн» сүрүн агробырамыысыланнай быыстапкаҕа мэтээлинэн наҕараадаламмыта. Ону тэҥэ Чурапчы улууһун Мырыла сэлиэнньэтиттэн Күннэй Тимофеева хомуйбут мүөтэ Москва куорат таһыгар ыытыллыбыт «Арассыыйа бастыҥ мүөтэ» Бүтүн Арассыыйатааҕы куонкуруска 600 тахса мүөт көрүҥүттэн уопсай рейтиҥҥэ 4 миэстэни ылбыта биллэр.

«Саха сирин мүөтэ норуоттар икки ардыларынааҕы  таһымҥа аан бастакытын үрдүктүк сыаналанна. Бу чаҕылхай ситиһии — саха мүөтүн дьикти уратыта араас наҕараадаларынан бигэргэнэр. Кэнники биэс сылга мүөтү оҥорон таһаарыы көрдөрүүтэ 4 төгүл улаатта», — диэн бэлиэтиир Саха сиригэр инвестициялары тардыыга уонна экспортка ааҕыныстыбатын бырайыактары олоххо киллэриигэ отдел начаалынньыга Николай Питимко.