Амма Соморсунугар спортивнай саала тутуллуоҕа

Бу туһунан Амма улууһун бастакы кулубата Афанасий Рязанскай төрөөбүтэ 150 сылыгар анаммыт мунньахха кэпсэттилэр. Афанасий Петрович сайдыылаах, сырдыгы, үөрэҕи тарҕатааччы, меценат, талааннаах салайааччы, өрөспүүбүлүкэ сайдыытыгар улахан кылаатын киллэрбит киһи этэ.

СӨ бырабыыталыстыбатын бэрэссэдээтэлин солбуйааччы Михаил Никифоров тохсунньу 20 күнүгэр тэрийэр хамыыһыйа мунньаҕын ыытан, үбүлүөйдээх тэрээһиннэри быһаарыстылар. Маны тэҥэ, нэһилиэккэ кыбартаалынай хочуолунайы, “Соморсун” хаһаайыстыбаҕа сүөһү өлөрөр сыаҕы тутарга уонна Константинов, Лонгинов уулуссаларын бетонунан бүрүйэргэ былаанныыллар.

150 миэстэлээх Норуот айымньытын дьиэтэ тутуллуохтаах. Былырыын Соморсун нэһилиэгэ «Комплексное развитие сельских территорий» бырагырааманан куонкуруска кыайбыта.

А.П. Рязанскай төрөөбүт нэһилиэгэр кини аата Соморсун орто оскуолатыгар иҥэриллибитэ. Кини үбүлүөйүгэр өрөспүүбүлүкэтээҕи научнай-практическай кэмпириэнсийэ, улуустааҕы ыһыах ыытыллыахтара. Ону тэҥэ, А.П. Рязанскай аатынан “Олохтоох салайыныы сайдыытыгар ураты үтүөлэрин иһин” диэн мэтээл олохтонуоҕа.