Амма суола ураты болҕомтоҕо ылыллар

Быйыл «Амма» айан суола улаханнык алдьанан эрэйдээбитин өрөспүүбүлүкэ олохтоохторо үчүгэйдик билэллэр. Манна соторутааҕыта «Дьулуур» өрөспүүбүлүкэтээҕи адаптивнай успуорт спартакиадата буолан ааспыта. Онон сиэттэрэн Ил Дархан Айсен Николаев икки күн бу улууска үлэлээбитэ.

Бүгүн Айсен Николаев «Саха» ГТРК «Россия 24» ханаалын быһа эпииригэр Аммалыыр суол кыһалҕатын туһунан эмиэ аҕынна.

Ол курдук, «Амма» айан суолун кыһалҕата Амма, Уус Маайа уонна Мэҥэ Хаҥалас улуустарын олохтоохторун долгутар.

«Хомойуох иһин «Амма» айан суолун туһунан элбэх буруйдуур-сэмэлиир саҥалар иһиллэллэр. Бу хайысханан суол-иис мөлтөх. Сылга ортотунан 24 км суол оҥоһуллар. 10 км усталаах суол аспаалланар. Суолу тутааччылар былааннаахтык үлэлииллэр», – диэтэ Ил Дархан.