«Амма» суолу чөлүгэр түһэриигэ 35 мөл.солк. тахса үп-харчы тыырылынна

Күүстээх ардахтан алдьаммыт «Амма» трасса учаастактарыгар чөлүгэр түһэрэр үлэлэр ыытыллыахтара.

Бу сыалга 35 мөл. солк. тахса үп-харчы көрүлүннэ. Бу туһунан  Саха сиринээҕи айан суолларын управлениетыгар иһитиннэрдилэр. Манна Мэҥэ-Хаҥалас улууһугар, ардах кэнниттэн суол туруга мөлтөөбүт 53-с килэмиэтэртэн 93-с килэмиэтиргэ диэри учаастактар тустарынан этиллэр.

«Эбии 35 мөл. 481 тыһ. солк. үп-харчы суол алдьаммыт учаастактарын оҥорууга уонна тырааныспар мэһэйэ суох сырыытын хааччыйыыга тыырылынна», — диэн суол управлениетын иһитиннэриитигэр суруллар.

Билигин айа-сырыыга уустуктардаах сирдэргэ тиэхиньикэ уонна үлэһиттэр суукканы быһа дьуһуурустубалара тэрилиннэ. Бэдэрээччит — «СУ-77» хампаанньа.

Санатан эттэххэ, от ыйын 27 күнүгэр «Амма» трасса 74-с килэмиэтиригэр бөдөҥ таһаҕас тиэйэр массыыната суолу бүөлээн харгыстары үөскэппитэ.