Амма улууһугар эр киһи сураҕа суох сүппүт

Олунньу 2 күнүгэр, сарсыарда 07:35 чааска, Быыһыыр сулууспаҕа Амма улууһун полициятыттан иһитиннэрии киирбит. Онно этиллэринэн, тохсунньу 29 күнүгэр 1973 с.т. эр киһи тыаҕа баар дьиэтиттэн тахсан баран төннүбэтэх.

Дьиэтэ Үөттээх үрэх үрдүгэр турар эбит. Эр киһи Мэҥэ-Хаҥалас улууһун Чыамайыкы сэлиэнньэтин диэки сатыы барбыт. Дьиэтиттэн Чыамайыкыга диэри 50-ча километр кэриҥэ.

Олунньу 2 күнүгэр сарсыарда 04:00 чааска эр киһини көрдүү Амма улууһун ИДьМ икки үлэһитэ уонна биир волонтер айаннаабыттар.

Киэһэ 19:00 чаас туругунан, Мэҥэ-Хаҥалас улууһун Чыамайыкы сэлиэнньэтин диэки барбыт киһи суола көстүбүт.

Көрдүүр бөлөх Харбы диэн сиргэ хоно хаалбыттар. Бу сир Үөттээх үрэх аттынааҕы сылгы баазатыттан 20 км тэйиччи сытар. Сибээстэрин спутниктааҕы төлөпүөнүнэн туталлар.