Амма улууһугар ыытыллар Олоҥхо ыһыаҕын бырагыраамата бигэргэннэ

Өрөспүүбүлүкэтээҕи суолталаах тэрээһин «Муона чараҥа» диэн сиргэ И.А. Швердин аатынан култуура уонна сынньалаҥ пааркатыгар ыытыллыаҕа.

Олоҥхо аһыллыытын сиэригэр-туомугар 1200-тэн тахса киһи кыттыаҕа. Ол курдук, Олоҥхо тыйаатырын, Судаарыстыбаннай цииркэ, С.А. Зверев-Кыыл Уола аатынан үҥкүү Национальнай тыйаатырын, АГИКИ,  култуура кэллиэһин айар кэлэктииптэрэ — сүрүн кытааччылар. Амма улууһуттан  900 киһи кыттыаҕа.

Олоҥхо ыһыаҕын аһыллыытын сиэрэ-туома бэс ыйын 20 күнүгэр 11 чаастан, сабыллыыта бэс ыйын 21 күнүгэр 18 чаастан буолуоҕа.
Ыһыах бырагыраамата олус дириҥ ис хоһоонноох. Ол курдук, араас куонкурустары таһынан, 6 испэктээҕи көрдөрүөхтэрэ. «Олоҥхону ааҕабыт» 3-с өрөспүүбүлүкэтээҕи марафоҥҥа Тимофей Захаров-Чээбий «Ала Булкун» олоҥхотун ааҕыыга улуустартан кэлбит 100 киһи кыттыаҕа.  «Сэһэн түһүлгэтэ» диэн дискуссия былаһаакката үлэлиэҕэ. » Тыыннаах дорҕоон» диэн   этнобэстибээл буолуоҕа.
Олоҥхо ыһыаҕын бырагырааматыттан салгыы сиһилии билиһиннэрэн иһиэхпит.