Амма улууһун баһылыга оройуон киинин эбийиэктэрин хочуолунайдарын үөрэттэ

Бу күннэргэ Амма улууһун баһылыга Степан Кузьмин  кыстыкка киириигэ бэлэмнэнии чэрчитинэн улуус киинин хочуолунайдарын туруктарын кытта билистэ. 

Бу үлэ түмүгүн баһылык Степан Кузьмин бэйэтин телеграм-ханаалыгар сырдатта:

«Матросов уулуссатыгар турар хочуолунайбыт киһини үөрдэр,  сүрдээх улахан өрүмүөн үлэтэ барбыта тута көстөр. Бу манна саҥа  «изовскай» оһохтор, дизельнэй ыстаансыйа кэлэн тураллар уонна  кыһын эбии бэһис оһох кэлэн туруохтаах.

Стадион хочуолунайын хантараак быһыытынан бэдэрээтчит сыл бүтүөр диэри  туттарыахтаах этэ. Ол эрээри арыый эрдэлээн, үлэ-хамнас кэминэн баран, хочуолунайга бу күннэргэ  боруобалаан көрүү ыытыллан, ититии ситимин  киллэриэхпит. Оройуон үрдүнэн ититии ситимин хааччыйар тэрилтэлэр эбийиэктэрэ барыта бэлэм, сөптөөх өрөмүөн барда.

Ыытыллыбыт өрөмүөнү сыл устата кэтээн көрүөхпүт уонна  бэрэбиэркэни аастаҕына, эһиилгэттэн саҕалаан, чааһынай дьиэлэри холбооһуну  элбэтэр былааннаахпыт».