Амма улууһун суоппардара быһыты ыраастааһыҥҥа көмөлөстүлэр

Бүгүн СӨ Экологияҕа министиэристибэтин айылҕа харыстабылын иниспиэктэрдэрэ Амма улууһун Кириэстээх өрүс күргэтин анныгар сытар оту-маһы уонна талахтары ыраастааһыны тэрийдилэр.

Бу учаастакка сыл аайы халаан элбэх мас сыыһын, бөҕү аҕалан уу сүүрэрин бүөлүүр. Мунньуллубут бөх-саха күргэни алдьатарын эрэ буолбакка, өрүс экологическай туругун буортулуур.

Айылҕа таһаарар содулуттан балык ыамын кыра үрэхтэртэн таһаарарын, көһүүтүн мэһэйдиирэ. Маннык харыыны кэмигэр туораппатахха, балык элбээһин аҕыйатыан сөп.

Бүгүн көмөҕө нэһилиэк анал тиэхиньикэлээх суоппардара Степан Ефимов уонна Николай Захаров кэлэн көмөлөстүлэр. Кинилэр буор-босхо бэйэлэрин «КамАЗ» массыыналарынан күргэҕэ анньыллан харыыны үөскэппит маһы, бөҕү ыраастаатылар. Бу үтүө санаалаах дьон төрөөбүт дойдуларын айылҕатын харыстааһыҥҥа кылааттарын киллэрдилэр.

Ыраастааһын үлэлэрэ олохтоохторго мэһэйдээбэт курдук, сарсыарда эрдэ ыытылыннылар диэн СӨ Экологияҕа министиэристибэтин пресс-сулууспата иһитиннэрэр. Ол түмүгэр өрүс түгэҕиттэн 8 кубометр мас таһаарылынна.   Уу сүүрүгэ, айылҕа чөлүгэр түстэ, балык көҥүллүк устара хааччылынна.