Аммалар Дьокуускайдааҕы тыа хаһаайыстыбатын тиэхиньикумун идэҕэ бэлэмниир киинигэр үөрэнэллэр

СӨ Бырабыыталыстыбата Амма улууһун олохтоохторугар отчуотун иитинэн, олунньу 7 күнүгэр үөрэх уонна билим миниистирэ Нюргуна Соколова В.Г.Короленко аатынан Амма 1-кы нүөмэрдээх орто оскуолатыгар сылдьыбыта.

Бу сырыытын кэмигэр миниистир “Байылыат” билим-эспэримиэн уһаайбатын үлэтин кытта билсибитэ. Оскуола дириэктэрэ Юрий Шишигин кэпсээбитинэн, тустаах уһаайбаҕа үлэ уруогун, уруогу таһынан дьарыктары ыыталлар, манна оҕолор эбии билиини иҥэринэллэр, үөрэммиттэрин туһунан сибэдиэтэлистибэ ылаллар.

“Билим-эспэримиэн уһаайбатын тэрийэр туһунан бырайыагы улууспут урукку баһылыга, норуот суруйааччыта Наумов Дмитрий Федосеевич сүбэлээбитэ. Бырайыагы уһун сыллар устата эбии үөрэхтээһин педагога Сибирякова Мария Семеновна салайан үлэлэтэр. Бырайыак оҕону кыра сааһыттан тыа сирин олоҕор сыһыарар соруктаах: олоҕу-дьаһаҕы оҥостууга, бэйэ дьыалатын тэриниигэ, олоххо бэйэ миэстэтин буларга уонна идэни ыларга. Маныаха анаан билим-эспэримиэн уһаайбатыгар усулуобуйа барыта оҥоһуллубута: тыа киһитин дьиэтэ, саадтаах, хотонноох уонна оҕуруоттаах тэлгэһэ. Сайынын “Байылыат” уһаайбаҕа үлэ, эти-хааны чэбдигирдэр оҕо лааҕыра үлэлиир, оскуола үөрэнээччилэрэ үүнээйини, кыылы көрөллөр-истэллэр, кэтээн көрөллөр, эспэримиэннииллэр, оттон кыһынын билим-быраактыка кэмпириэнсийэтигэр кыттарга аналлаах чинчийэр үлэлэри суруйаллар” – диэн дириэктэр Юрий Шишигин кэпсиир.

Бэлиэтээн эттэххэ, былырыын Бырабыыталыстыба отчуотун кэмигэр олохтоохтор Амма улууһугар орто анал үөрэх суоҕун туһунан боппуруоһу көтөхпүттэрэ. Бу  кыһалҕа ырытыһыы сүрүн тиэмэтинэн буолбута, үлэ түмүгүнэн Амма 1-кы нүөмэрдээх оскуолатын уонна Дьокуускайдааҕы тыа хаһаайыстыбатын тиэхиньикума бииргэ үлэлэһиигэ сөбүлэҥ түһэрсиилэрин туһунан быһаары ылыллыбыта.

Бу сөбүлэҥҥэ олоҕуран, Амма 1-кы нүөмэрдээх оскуолатыгар Амматааҕы идэҕэ бэлэмниир киин аһыллыбыта. Киин Амма улууһун улахан дьонун уонна үрдүкү кылааһын үөрэнээччилэрин инники идэлэригэр ирдэнэр сатабылга үөрэтэр, билии ылалларыгар көмөлөһөр аналлаах.

“Тустаах кииҥҥэ үөрэҕи үрдүк таһымҥа хааччыйар тиэхиньикум преподавателлэрэ үлэлииллэр, тыа хаһаайыстыбатын хайысхатыгар ирдэнэр идэлэри ылалларыгар көмөлөһөллөр. 2024-2025 үөрэх дьылыгар СӨ бүддьүөтүттэн 4 оробуочай идэнэн дьону профессиональнай үөрэх бырагырааматынан идэҕэ бэлэмнээһиҥҥэ 30 кубуота көрүллүбүт: сылгыһыт,  көтөрү иитээччи, тигээйини иитээччи,  арыы оҥорооччу. Кэлиҥҥи үс сылга Амматааҕы идэҕэ бэлэмниир киин бэлэмнээбит 100 киһи оробуочай идэ туһунан сибэдиэтэлистибэни ылла” – диэн Дьокуускайдааҕы тыа хаһаайыстыбатын тиэхиньикумун дириэктэрэ Андрей Самсонов кэпсиир.

Билигин Идэҕэ бэлэмниир кииҥҥэ оскуола үөрэнээччилэрэ тыа хаһаайыстыбатын салаатыгар уопут ылыахтарын сөп. Бу кинилэр салгыы үөрэнэллэригэр уонна үлэ булалларыгар кэскиллээх.  2022 сылтан “СӨ “Профессионалитет” федеральнай бырайыагы тарҕатыы бырагырааматын “Мин бастакы идэм” тэрээһин иитинэн үс сыл устата 9-11 кылаас 66 үөрэнээччитэ көтөрү, тигээйини иитээччи, массыынанан ыыр оператор, сылгыһыт идэлэригэр босхо үөрэннилэр. Ону тэҥэ, Эмис орто оскуолатын  “Элиэтиир хоһуун” бырайыагынан 9 үөрэнээччи сылгыһыт идэтигэр үөрэниини ааспыттар. Үөрэҕи ааспыттарын туһунан докумуону ылбыттарын кэннэ оҕолор бэйэ дьыалатын тэринэллэригэр кыах бэриллэр. Бу туһунан Үөрэх уонна билим министиэристибэтэ суруйар. Сиһилии манна ааҕыҥ.