Тутуу биригээдэтэ Өймөкөөҥҥө биир ый үлэлээтэ

Бу күннэргэ Өймөкөөн сэлиэнньэтигэр халаан уутуттан улаханнык эмсэҕэлээбит ыал олбуорун иһигэр балааккаҕа оһох оттунан, ас астанан олорон дьиэтин өрөмүөнүн үмүрүтэ сатыырын үгүс дьон итэҕэйбэт этэ.

Бу туһунан Өймөкөөн улууһун «Северная заря» уонна «Хотугу сардаҥа» хаһыаттар холбоһуктаах эрэдээксийэлэрин уопсастыбаннай кэрэспэдьиэнэ Тамара Винокурова маннык сырдатта:
— Эргэ дьиэ алдьаныыта-кээһээниитэ улахана бэрт буолан, Кондаковтар олус хараастан сырыттахтарына,  Таатта улууһуттан тутуу биригээдэтэ көмөҕө кэлэн, күргүөмүнэн үлэлээн-хамсаан барбыттара. Үлэ күөстүү оргуйан, дьиэ акылаата көтөҕүллэн,  инчэҕэй буор таһыллан, саҥа хаптаһыннартан муоста тэлгэннэ. Таатталарга Томпо биригээдэтэ кэлэн үлэлэспитэ. Онтон аны үөрэх управлениетын салайааччытын солбуйааччыта  Иван Тарабукин  салайар  улуус үөрэҕириитин салаатын үлэһиттэрэ састааптаах  Таатта улууһун иккис биригээдэтэ дьиэни чөлүгэр түһэрии үлэтин кыайа-хото туппута. Дьиэ хаһаайката онон сүргэтэ көтөҕүллэн, олус долгуйан туран «билигин биһиги санаабыт олох бөҕөх.  Дьиэбит саҥатыгар түстэ диэххэ сөп.  Ситэри оҥостон кыстыырга бэлэмнэнэбит. Улахан көмө, өйөбүл буолбут МЧС үлэһиттэригэр,  Хаҥалас, Горнай, Томпо улуустарын уонна Таатта  икки биригээдэтигэр махталбыт муҥура суох», —  диэн санаатын үллэһиннэ.

 Иккис кэпсиир ыалым — Ивановтар. Кинилэр дьиэлэрэ улаханнык урусхалламмыта. Түннүктэрэ барыта хаптаһыннарынан саайыллан турара «бу дьиэ чөлүгэр түспэт чинчилэммит эбит» диэн хомолтолоох санааны үөскэппитэ.  Ону Таатта хоһуун уолаттара санааларын ууран,  кыахтаахтык дьаныһан, туруулаһан туран үлэлээн, икки күн иһигэр арыый үрдүк сиргэ саҥа акылааты түһэрдилэр.

Онон ыаллар эһиил сайын бу маны салгыы туттуохтара.  Ааһан иһэн бу саҥа акылааты көрөн «Хараҥаҕа тыкпыт сырдык » диэн этиини санаан ыллым. Мария уонна Андрей Ивановтар махтал тылларын тиэрдэр олус наадалаах: «Эһиги үтүөҕүтүнэн, көмөҕүтүнэн алаһа дьиэбит сылаас буолара чахчы. Бэйэҕит эйгэҕитинэн, бу курдук бигэ туруккутун өрүү тута сылдьан үлэлээҥ-хамсааҥ, чэгиэн-чэбдик сылдьыҥ.  Биһиэхэ сырдык санааны, улахан өйөбүлү биэрбиккитигэр ис сүрэхтэн махтанабыт!».
Өймөкөөҥҥө саамай уһун болдьоххо үлэлии кэлбит Амма биригээдэтин ахтыбат буолуохха сатаммат. 

Руслан Смирников салайааччылаах бөлөх барыта 15 ыалга көмөлөһөн, үлэ үөһүгэр сырытта.  Чугас ыалбар Сивцевтэргэ хайдах курдук үтүө суобастаахтык, кыһаллан-мүһэллэн үлэлээбиттэрин илэ харахпынан көрөн, истэн, кинилэри кытта кэпсэтэн-ипсэтэн сырыттым.

Бу кылгас суруйуубар бэйэм чугастык алтыһар дьонум, кэллиэгэлэрим  тустарынан сырдаттым. Үтүөнү оҥоруу хаһан баҕарар хайҕаллаах дьыала.  «Үтүө үтүөнэн эргиллэр » диэн мээнэҕэ эппэттэр.  Бу уустук кэмҥэ Өймөкөөн олохтоохторугар илиилэрин утары ууммут дьону бука барыларын ааттыыр кыахпыт суох.  Ол гынан баран, барыларыгар махтал тылларын, сүрэхпит сылааһын аныыбыт.

Санаабыккыт сатанан, толкуйдаабыккыт туолан истин, илиигит туппута илгэлээх буоллун, ил-эйэ эҥэрдэстин, дьол-соргу тосхойдун диэн алҕаатахпыт буоллун!