Бэҕэһээ Амма улууһун Эмис нэһилиэгэр Арҕаа Тэгэрээттэ балыгын 15 буолан кырдьаҕастар үллэһиннибит.
Эмис нэһилиэгэ элбэх собо балыктаах күөллэринэн баай нэһилиэк. Улахан эбэбитигэр Тукулуттаҕа ааспыт нэдиэлэҕэ муҥха олоҥхотун чэрчитинэн улуустан, атын сиртэн кэлбит ыалдьыттардыын, нэһилиэк олохтоохторо куул чиэппэрдиитэ үллэстэн үөрэн-көтөн тарҕаспыппыт. Нэһилиэкпитигэр хас сыл аайы Афанасий Бубякин, Владимир Константинов, Никита Иванов, Прокопий Бубякин биригээдэ тэринэн муҥхалыыллар. Сыллата кырдьаҕастарга дойдуларын минньигэс балыгынан хааччыйаллар. Ол курдук быйыл Владимир Константинов биригээдэтэ икки куул инчэҕэйинэн балыгы нэһилиэк ытык кырдьаҕастарыгар диэн бэлэх ууннулар. Сатаан балыктаабат, чааччыммат дьоммутугар үөрдэ-көтүтэ тиэрдиэхпит. Махтана, минньигэс иҥэмтэлээх аспытын хоргуннаах балык миинин амсайыахтара.
Онтон бэҕэһээ Арҕаа Тэгэрээттэ күөлүгэр кырдьаҕастар муҥхалаан, кыһыҥҥы сылаас күнү баттаһа, барыта 15 буолан сырыттыбыт. Баһылыкпыт Прокопий Бубякин муҥхатынан тартыбыт. Муҥха үлэтэ эдэр киһи күүһэ суох буолбат. Ол курдук Прокопий Бубякин, Андрей Смирнов, Александр Ларионов, Остап Дмитриев, Станислав Бубякин халыҥ мууһу тэһэн муҥха сырыытын иилээн-саҕалаан биэрдилэр. Урукку тыа киһитэ оҕо сааһыттан ыарахан үлэ диэн туора турбакка үлэлээн кэлбит дьон буоллаҕа. Ол чээрэтинэн анньыыга бэтэрээннэрбит Петр Петров, Чурапчыттан ыалдьыт Захар Барашков эдэрдэртэн хаалсыбакка үлэлээтилэр. Кырдьаҕастарбыт Иосиф Петров, Семен Захаров, Мария Захарова, Софья Соловьева тэбис-тэҥҥэ көмөлөстүлэр. Дьэ, бу курдук саха киһитэ кыра да кэлбит байанай бэлэҕэр үөрэн, махтанан тарҕастыбыт.
Эмис нэһилиэгин социальнай үлэһитэ Прасковья Бубякина
Бүгүн, ыам ыйын 17 күнүгэр, Амма улууһугар Олоҥхо ыһыаҕын тэрийэр кэмитиэт мунньахтаата. СӨ Бырабыыталыстыбатын бэрэссэдээтэлин…
2024 сылга Саха сиригэр 76 социальнай эбийиэги тутары былаанныыллар. Олор истэригэр сорох тутуулар национальнай бырайыак…
Бүгүн Кэбээйи улууһун дьаһалтатын социальнай хантараагынан судаарыстыбаннай социальнай көмөнү оҥорууга хамыыһыйа быйылгы сыл 4 ыйынааҕы…
Былырыын Чурапчы улууһугар түөрт оҕоҕо бэйдиэ сылдьар ыттар саба түһэн эмсэҕэлэппиттэрэ. Бэйдиэ сылдьар ыттары көрүүгэ-истиигэ…
Өлүөнэ өрүскэ муус хойуутук устан Дьокуускай, Нам, Мэҥэ Хаҥалас оройуоннарынан ааһар. Уу таһыма Кангаласс микро-оройуонугар…
Бүгүн Ил Дархан Айсен Николаев Арассыыйа-Кытай ЭКСПО-ҕа РФ бэрэсидьиэнэ Владимир Путиҥҥа уонна Кытай норуодунай өрөспүүбүлүкэтин…