Аммаҕа баһаарга икки киһи өлбүтүнэн процессуальнай бэрэбиэркэ ыытыллар

Өлүөнэ өрүс уҥуоргу оройуоннар икки ардыларынааҕы Саха сиринээҕи Силиэстийэлиир кэмитиэтин отделынан  Амма сэлиэнньэтигэр баһаар чахчытынан процессуальнай бэрэбиэркэ ыытыллар. Бу туһунан Саха сиринээҕи Силиэстийэлиир кэмитиэтин пресс-сулууспата иһитиннэрэр.

Силиэстийэ быһаарыытынан, бу сыл кулун тутар 14 күнүгэр сарсыарда Амма сэлиэнньэтигэр Кириэстээх уулуссаҕа чааһынай дьиэ умайбыт. Ол кэмҥэ дьиэ иһигэр үс эр киһи баар эбит. Барыллаан быһаарыынан, биир эр киһи оһоҕу отторугар дизельнэй уматыгы туһаммыт, түмүгэр баһаар тахсыбыт. Баһаар түмүгэр икки эр киһи өлбүт, үһүс эр киһи балыыһаҕа киирбит. Киниэхэ бары наадалаах мэдиссиинэ көмөтө оҥоһуллар.

Билигин быһылаан тахсыбыт миэстэтин көрүүтэ ыытыллар. Процессуальнай бэрэбиэркэ чэрчитинэн тахсыбыт быһылаан төрүөтэ олохтонор. Бэрэбиэркэ түмүгүнэн федеральнай сокуоннарга сөп түбэһиннэрэн процессуальнай быһаарыы ылыллыаҕа.

Аммаҕа баһаарга икки киһи өлбүт