Аммаҕа байыастар оҕолоругар «Үтүө санаа харыйата» аахсыйа саҕаланна

Ахсынньы 1 күнүгэр Амма улууһугар сыл аайы ыытыллар «Үтүө санаа харыйата» аһымал аахсыйа биллэрилиннэ. Улуус дьаһалтата бары олохтоохтору байыаннай дьайыы кыттыылаахтарын оҕолорун Саҥа дьыллааҕы баҕа санааларын толорорго кыттыһарга ыҥырар.

Бу үтүө үгэскэ кубулуйбут тэрээһиҥҥэ улуус баһылыга Степан Кузьмин, кини солбуйааччылара, дьаһалта үлэһиттэрэ, нэһилиэктэр баһылыктара, ону тэҥэ тэрилтэлэр уонна салалталар салайааччылара көхтөөхтүк кыттыстылар. Аахсыйа сүрүн сыалынан Ийэ дойдуларын көмүскүү сылдьар, байыаннай дьайыы кыттыылаахтарын уонна мобилизацияламмыт буойуттар оҕолорун Саҥа дьыллааҕы баҕа санааларын толоруу.

Улуус дьаһалтата бэлэхтэри ахсынньы 15 күнүгэр диэри хомуйуоҕа. Онтон Саҥа дьылга диэри нэһилиэктэринэн тарҕатыахтара. Быйыл уопсайа 277-тэн тахса оҕону үөрдүөхтэрэ.

«Улууспут бары олохтоохторун аахсыйаны өйөөн, биһиги болҕомтобутугар, кыһамньыбытыгар наадыйар оҕолорго бырааһынньыктааҕы үтүө настырыанньаны бэлэхтэһэргэ ыҥырабыт. Саҥа дьылы үтүө дьыаланан уратытык бэлиэтиэҕиҥ!» — диэн улуус дьаһалтатын пресс-сулууспата ыҥырыытыгар суруйар.