Аммаҕа байыастар дьиэ кэргэттэригэр анаан субуотунньук тэрийдилэр

Амма улууһун дьаһалтатын уонна улуустааҕы Тыа хаһаайыстыбатын управлениетын кэлэктииптэрин эр дьоно байыаннай дьайыы кыттыылаахтарын – бииргэ үлэлиир дьонун дьиэ кэргэттэригэр муус бэлэмниир үлэ десанын тэрийдилэр, диэн Амма улууһун дьаһалтатын пресс-сулууспата иһитиннэрэр.

Саха сирин тыйыс тымныылаах кыһыныгар муус үгүс ыалга олоххо биир наадалаах өйөбүлүнэн буолар. Ону өйдөөн, бииргэ үлэлиир дьон кэргэттэрэ, уолаттара, аҕалара гражданскай иэстэрин толоро сылдьар биир идэлээхтэрин дьиэ кэргэттэрин уунан хааччыйаары, баҕа өттүнэн тус бириэмэлэрин анаатылар.

Биир күн иһигэр 6 туоннаттан тахса муус бэлэмнэннэ уонна тиэрдилиннэ. Бу муус байыаннай кыттыылаахтарын дьиэ кэргэттэрин иһэр уунан хааччыйыыга туһаныллыаҕа. Маннык көҕүлээһиннэр аммалар гражданскай эппиэтинэстэрин уонна түмсүүлээхтэрин чаҕылхай холобурунан буолар. Улуус дьаһалтата субуотунньук бары кыттыылаахтарыгар  дириҥ махталын тиэрдэр. Ону сэргэ, байыаннай дьайыы кыттыылаахтарын дьиэ кэргэттэригэр өрүү бары өттүнэн өйөбүл оҥорорун биллэрдэ.