Аммаҕа дьахтар грузовигы уоттуу сатаабыт

Амматааҕы полиция дьуһуурунай чааһыгар олохтоох киһи массыынатын уоттуу сатаабыттарын туһунан иһитиннэрбит. Эр киһи быһаарбытынан, дьиэтин таһыгар турбут «Урал» массыыната умайан тахсыбытын киэһэ көрбүт, билбэт киһитэ уоттуу сатаабыт. Эмсэҕэлээччи тырааныспарын суһаллык бэйэтэ умуруорбут диэн СӨ ИДьМ пресс-сулууспата иһитиннэрэр.

Холуобунай ирдэбил үлэһиттэрэ 45 саастаах олохтоох дьахтар уобаланарын быһаарбыттар.

Барыллаан быһаарыынан, дьахтар уонна бу эр киһи эрдэ айдаарса сылдьыбыттар эбит. Онуоха дьахтар итирик туруктаах сылдьан массыына бааҕын испиискэнэн умата сатаабыт.

Дьахтарга холуобунай дьыала тэриллибит.