Аммаҕа хаар түстэ

Ыам ыйын 12-13  күннэригэр Амма улууһугар халыҥ хаар түстэ, үрүҥ суорҕанынан үллүктээтэ. Амма өрүс мууһа устан бүппүтэ, Алдан эбэҕэ киллэрбитэ. Кэрэ кырдалларга ньургуһуннар үүнэн, сэрбэйэ быган, күҥҥэ мичээрдии сандаарбыттара. Ол бэйэлэрэ халыҥ хаарынан бүрүлүннэхтэрэ.

Ол эрээри, ньургуһун хаартан чаҕыйбат. Биир-икки күнүнэн хаар ууллуо, ньургуһуннар туох да буолбатаҕын курдук, өссө элбээн үүнүөхтэрэ. Күн-дьыл төһө да бу курдук кубулҕатырдар, сандал саас кэбэҕэстик бэриммэт!

Оттон Дьокуускай эргин хаар түһүө дуо?

Интэриниэт саайтара билгэлииллэринэн, өрөбүл күннэргэ 10-12 кыраадыс сылаас буолуо, күн былыт быыһынан көрөр. Онтон кэлэр нэдиэлэ саҕаланыыта, ыам ыйын 15-18 күннэригэр хас да күн устата ардыыр, ол эрээри, олус тымныйбат диэн көрдөрөр.

Бу кэмҥэ киин улуустарга Өлүөнэ эбэбит мууһун көтөҕөн, улуутуйа устара күүтүллэр. Ол кэнниттэн эмискэ сылыйан, от-мас көҕөрөн барыаҕа.