Аммаҕа коллекционердар ыһыахтаатылар

Бу күннэргэ Амма улууһугар  коллекционердар  ыһыахтара ыытыллан, үгүс киһи муһунна. Тэрийээччилэринэн Болугур нэһилиэгин коллекционердарын түмсүүтэ уонна олохтоох дьаһалта буоллулар.

Марфа Ивановна салалтатынан былааннаммыт тэрээһин үрдүк таһымнаахтык ыытыллан, араас көрдөөх күрэхтэр, оонньуулар буоллулар, эҕэрдэ нүөмэрдэр көрдөрүлүннүлэр. Былаат быыстапкатыгар былаат арааһа ыйанан,  кэлбит дьон  урукку эбээлэрбит мааныга кэтэ  сылдьыбыт  солко былааттарын тутан-хабан, көрөн астыннылар. «Дьахтар кэтэһэр ыһыаҕы саҥа былаат баанаары» диэн ыһыахпыт тиэмэтинэн эгэлгэ элбэх дьэрэкээн былаат ыһыаҕа диэн манна буолла.
Түөрт күрэх ыытылынна, барылара тус-туһунан миэстэлэрдээх. Онон кэлбит түмсүүлэр бука бары илии тутуурдаах бардылар. Күммүт итиитэ сүрдээх да буоллар Кыыс Амма ыраас уутугар сөтүөлээн, чэбдигирэн астынныбыт. Тэрээһин Амма кытылыгар анал сынньанар базаҕа ыытыллыбыта наһаа үчүгэй. Сөтүө бөҕөтүн сөтүөлээн, дуоһуйа астынныбыт.  Олохтоохтор саламаат, алаадьы, салаат, сибиэһэй ынах этиттэн миин буһаран күндүлээтилэр. Маанылаах остуолга олорон ирэ-хоро кэпсэттибит, остуол оонньуутун арааһын ыытан сэргэхсийдибит.

Кылгастык эттэххэ, тэрийээччилэргэ, чуолаан Марфа Ивановнаҕа, кини салайар түмсүүтүгэр сылдьыбыт ыалдьыттар ааттарыттан барҕа махталбын тириэрдэбин!
Туйгун доруобуйаны, дьиэ кэргэттэргитигэр этэҥҥэ буолууну,  коллекцияҕыт өссө хаҥыы турарыгар баҕарабын!

Сэргэ кыыһа Тускулаана, Амма. Болугур