Салгыы
Аммаҕа Олоҥхо ыһыаҕын эбийиэктэрин тутуу бэс ыйын 10 күнүгэр түмүктэниэҕэ

Аммаҕа Олоҥхо ыһыаҕын эбийиэктэрин тутуу бэс ыйын 10 күнүгэр түмүктэниэҕэ

18.05.2024, 16:55
Хаартыска -- Василий Бураев тиксэриитэ.
Бөлөххө киир:

Бэҕэһээ, ыам 17 күнүгэр, Амма улууһугар быйыл  ыытыллар Олоҥхо ыһыаҕын тэрийэр кэмитиэт көһө сылдьар сүбэ-мунньаҕа буолла.

Суолталаах тэрээһин туһунан Амма улууһун баһылыгын бастакы солбуйааччы Василий Бураев сиһилии иһитиннэрдэ:

Сүбэ-мунньахха СӨ Бырабыыталыстыбатын бэрэссэдээтэлин солбуйааччы, Амма улууһугар ыытыллар Олоҥхо ыһыаҕын тэрийэр кэмитиэтин салайааччыта Сергей Местников, Ил Түмэн спикерин бастакы солбуйааччы, СӨ Олоҥхо ыһыаҕын иккис Уон сылын бэлэмниир уонна  Национальнай тэрийэр кэмитиэтин бэрэссэдээтэлэ Александр Жирков, тутуу, урбаан уонна туризм, култуура миниистирдэрэ, успуорт, үөрэх, доруобуйа харыстабылын, инновация уонна сибээс, тыа хаһаайыстыбатын, ОДьКХ миниистирдэрин солбуйааччылара, биэдэмистибэлэр эппиэттээх үлэһиттэрэ, эбийиэктэри тутар бэдэрээтчиттэр туох үлэ ыытылларын ырыттылар, сүбэлэстилэр.

Тэрээһин “Муона чараҥа” диэн сиргэ, И.А. Швердин аатынан култуура уонна сынньалаҥ пааркатыгар улуус баһылыга Степан Кузьмин  өрөспүүбүлүкэтээҕи Олоҥхо ыһыаҕын регламенын быһыытынан анаан тутулла турар 19 сүрүн эбийиэги билиһиннэриититтэн саҕаланна.

“Уран-дизайн” бэрэдээтчит тэрилтэ салайааччыта Вячеслав Яроев Муона чараҥар ыытылла турар тутуу үлэтэ барыта бэс ыйын 10 күнүгэр түмүктэниэхтээҕин бэлиэтээтэ.

Олоҥхо ыһыаҕын тэрийэр кэмитиэтин көһө сылдьар мунньаҕын кыттыылаахтара тутулла турар эбийиэк 75% бэлэмин бэлиэтээтилэр. Онон өрөспүүбүлүкэҕэ 17-с төгүлүн ыытыллар Олоҥхо Ыһыаҕа Амма сиригэр-уотугар Муона чараҥын пааркатын киин түһүлгэтигэр аһыллыытын сиэрин-туомун бэлэмэ бэс ыйын 12 күнүттэн саҕаланыаҕа.

Мунньахха урбаан уонна туризм миниистирэ Юрий Ханды ыалдьыттары аһатыы, хорчуоппалар үлэлэрин быһаарыы былааннаахтык баран иһэрин иһитиннэрдэ. Бэс ыйын 5 күнүгэр дьону түһэрэр, аһатар боппуруостар быһаарыллан түмүктэниэхтэрэ.

Олоҥхо ыһыаҕын кэмигэр бэрээдэги көрүүгэ Дьокуускай уонна Амма ИДьО сулууспаларыттан 80-ча киһи үлэлиирин  туһунан Амматааҕы ИДьО салайааччыта  Василий Стрекаловскай иһитиннэрдэ.

 Успуорт миниистирин солбуйааччы Гаврил Мохначевскай Олоҥхо ыһыаҕа ыытыллар күрэхтэһиилэр, ат сүүрдүүтүн балаһыанньалара бигэргэтиигэ барбыттарын сырдатта. Култуура миниистирэ Афанасий Ноев бары тэрээһиннэргэ Амма улууһун олохтоохторо нэһилиэк аайы көхтөөх үлэни ыыталларын бэлиэтээн туран, улуус салалтатын уонна олохтоохторун  хайҕаата уонна махталын биллэрдэ.

Ол курдук, бары тэрилтэлэр, түөлбэлэр, уопсастыбаннай түмсүүлэр, норуот маастардара (иистэнньэҥнэр, мас уонна тимир уустара) араас сувенирдары, оҥоһуктары, ситиилэри ситиигэ, олбохтору тигиигэ үлэлииллэр.

“Саҥарар саҥам сататын сабаҕалааҥ, этэр тылым эгэлгэтин эридьиэстээҥ” 17-с Олоҥхо ыһыаҕын режиссерунан аммалар бэйэбит уолбут, Марфа уонна Сергей Расторгуев ааттарынан Саха судаарыстыбаннай цииркэ салайааччыта Сергей Расторгуев  айар бөлөҕө бэс ыйын 5 күнүгэр олохтоохтук көһөн кэлэн, өрөспүүбүлүкэтээҕи суолталаах тэрээһин аһыллыытын-сиэрин туомун бэлэмин саҕалыаҕа.

Бу күннэргэ Амма улууһун олохтоохторо Олоҥхо ыһыаҕар анаммыт субуотунньуктары тэрийэн, улууспут киинин уонна нэһилиэктэри тупсарыыга анал кыраапыктары оҥостон, күргүөмүнэн тахсан үлэлиэхпит. Бэс ыйын 10 күнүгэр сөптөөх үлэни түмүктээн, өрөспүүбүлүкэтээҕи таһымнаах тэрээһиҥҥэ толору бэлэм буолуохпут.

 

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
13 июня
  • 18°C
  • Ощущается: 17°Влажность: 55% Скорость ветра: 2 м/с

Сообщить об опечатке

Текст, который будет отправлен нашим редакторам: