Аммаҕа саҥа поликлиника аһылынна

Амма улууһун Амма сэлиэнньэтигэр аныгы поликлиника аһылынна. Саҥа мэдиссиинэ киинэ биир симиэнэҕэ 200 сырыыны көрөргө аналлаах, тэрилтэ сарсыҥҥыттан ыарыһахтары көрөн барыаҕа.

Поликлиниканы үөрүүлээх арыйыыга Айсен Николаев кыттыыны ылла.»Бу бэртээхэй поликлиника аһыллыытыгар Аммаҕа кэлэн турарбыттан олус үөрэбин. Бу 800 кв. миэтэрэ иэннээх аныгы эбийиэк. Үчүгэй хааччыллыылаах кэбиниэттэр аныгы мэдиссиинэ стандартарыгар барыларыгар эппиэттииллэр. Маннык эбийиэктэр улахан куораттарга эрэ буолбакка, тыа сиригэр эмиэ баар буолан эрэллэрэ кэрэхсэбиллээх, кэнники сылларга 100-тан тахса доруобуйа харыстабылын тутууларын арыйдыбыт. Бу Саха сирин олохтоохторун доруобуйаларын туругар дьайар, уһун үйэлээх дьон ахсаана эбиллэн иһэр», — диэн Айсен Николаев эттэ.

Амма улууһун нэһилиэнньэтин барытын хааччыйыаҕа амбулатория. Мэдиссиинэ тэрилтэтин дааннайынан, манна 16 600-тэн тахса киһи олорор, олортон 11500 — улахан дьон.

Үс этээстээх дьиэҕэ дьахтар консультацията, улахан дьон уонна оҕо регистратуралара, биэс куойкалаах күнүскү балыыһа, лаборатория, профилактика кэбиниэттэрэ, суһал көмө, исписэлиистэр кабинеттара бааллар.

Балыыһа рентген, УЗИ аппарааттарынан, стоматология тэриллэринэн, эндоскопическай, маммографическай, флюорографическай тэриллэринэн хааччыллыбыт. Амма улууһугар аан бастаан эндоскопия уонна ЛОР-комбайн эмиэ туруорулуннулар диэн ЯСИА иһитиннэрэр.

Амма улууһугар доруобуйа харыстабылын саҥа  эбийиэгэ Арассыыйа бэрэсидьиэнэ Владимир Путин сорудаҕынан олоххо киирбит «Уһун уонна көхтөөх олох» национальнай бырайыак чэрчитинэн, доруобуйа харыстабылын систиэмэтин сайыннарыыга Ил Дархан таһаарбыт ыйааҕын чэрчитинэн тутулунна.