Аммаҕа саҥа поликлиниканы тохсунньу бүтүүтэ арыйар былааннаахтар

Амма сэлиэнньэтигэр биир симиэнэҕэ 200 киһини көрөр кыамталаах поликлиниканы тохсунньу бүтүүтэ арыйар былааннаахтар.

Мэдиссиинэ тэрилтэтигэр аныгылыы  оборудование уонна миэбэл туруораллар. Бу туһунан Амма улууһун дьаһалтатын пресс-сулууспата иһитиннэрдэ.

Ону кытта тэҥҥэ дьиэ иһигэр уонна тас өттүгэр киэҥ далааһыннаах субуотунньуктар ыытыллаллар. Улуус тэрилтэлэрин  кэлэктииптэрэ кыраапыгынан хомуур үлэтигэр тахсаллар.

«Поликлиника аһыллыыта улуус бары олохтоохторугар күүтүүлээх уонна олус суолталаах түгэн. Мэдиссиинэ көмөтүн хаачыстыбатын биллэ үрдэтиэҕэ. Биһиги болдьоммут кэмигэр эбийиэк  толору бэлэм буоларын туһугар бары күүспүтүн уурабыт. Түмүктүүр үлэлэргэ уонна субуотунньуктарга кыттар дьоҥҥо барыларыгар улахан махтал», — диэн бэлиэтээтэ Амма улууһун баһылыга Степан Кузьмин.

Амма улууһугар доруобуйа харыстабылын саҥа эбийиэгэ РФ бэрэсидьиэнэ Владимир Путин сорудаҕынан «Уһун уонна көхтөөх олох» национальнай бырайыак чэрчитинэн олоххо киирэр, ону тэҥэ Ил Дархан  доруобуйа харыстабылын тиһигин сайыннарыы туһунан Ыйааҕынан тутуллар.