Аммаҕа успуорт бэтэрээнэ 70 сааһыгар анаммыт остуол тенниһигэр сэргэх күрэхтэһии буолан ааста

Ахсынньы 6 күнүгэр Амма сэлиэнньэтин «Дружба» успуорт комплексыгар успуорт көрүҥүн бочуоттаах бэтэрээнэ Геннадий Васильевич Окороков 70 саастаах үбүлүөйүгэр анаммыт остуол тенниһигэр күрэхтэһии буолан ааста.

Күрэхтэһии үөрүүлээх аһыллыытыгар Амма улууһун баһылыга Степан Кузьмин эҕэрдэ тылын эттэ. Кини Геннадий Васильевич улууска остуол тенниһин сайыннарыыга уонна киэҥник тарҕатыыга сүҥкэн кылаатын бэлиэтээтэ уонна бары кыттааччыларга чаҕылхай, чиэһинэй киирсиини баҕарда.

Күрэхтэһиигэ Амма, Мэҥэ Хаҥалас, Уус Алдан уонна Чурапчы улуустарыттан 50 эр киһи уонна 19 дьахтар кытынна.

Күрэхтэһии хас да саастарынан араҥаҕа ыытыллыбыта, ол уопуттаах күрэсчиттэргэ да, остуол тенниһин сөбүлээн дьарыктанар эдэрдэргэ да бэйэлэрин көрдөрөр кыаҕы биэрдэ. Кыайыылаахтар уонна призердар үбүлүөйдээх, ону таһынан Амма улууһун, Амма уонна Сатаҕай нэһилиэктэрин дьаһалталара туруорбут грамоталарынан, мэтээллэринэн уонна сыаналаах бириистэринэн наҕараадаланнылар.

«Геннадий Васильевич Окороковка чэгиэн доруобуйаны, сэниэни-эрчими уонна сөбүлүүр успуорт көрүҥүн сайыннарыыга инникитин да ситиһиилэри баҕарабыт», — диэн суруйар Амма улууһун дьаһалтатын пресс-сулууспата.