Аммалар Өймөкөөҥҥө ыйы толору үлэлиир былааннаахтар

Бу күннэргэ Өймөкөөн улууһугар алдьатыылаах айылҕа иэдээниттэн эмсэҕэлээбит нэһилиэктэргэ олорор дьиэлэри чөлүгэр түһэрии үлэтэ бара турар.

Маныаха күүс-көмө буолар соруктаах араас улуустан кэлбит тутааччылар күргүөмнээх үлэҕэ ылсан, олохтоохторго көмөлөһө сылдьаллар.
Амматтан кэлбит биригээдэни кытта көхтөөх уопсастыбанньык, «Өймөкөөн» НКО бырабылыанньатын чилиэнэ Тамара Винокурова анаан көрсөн кэпсэттэ.

«Өймөкөөн нэһилиэгэр култуура дьиэтигэр түспүт сэргэх уолаттар миигин үөрэ-көтө көрүстүлэр.
Бөлөх салайааччыта Руслан Смирников, Амма Болугуруттан төрүттээх. Кини дьонун билиһиннэрэн, кэпсэтиини саҕалаата:

«Биһиги Аммабытыттан от ыйын 29 күнүгэр айаннаан баран, манна 30 чыыһылаҕа киэһэ тиийэн кэлбиппит.

Бастаан интэринээт дьиэтигэр өрөмүөн кэнниттэн 4 ыалга сырыттыбыт. Үлэбит, сүрүннээн, муоста көтүрүүтэ, буор таһыыта. Холобура, биир ыалга дьиэ акылаатын аннынан икки өттүттэн түөртүү «форточка» оҥордубут. Ити аата салгын оонньоон, хамсаан, түргэнник куурдун диэн оҥоһуллар ньыма.

Амма курдук ыраах сиртэн бачча кэлэн баран, аҕыйах күҥҥэ буолбакка, биир ыйы толору үлэлииргэ быһаарынныбыт. Кыһалҕаҕа түбэспит дьон бу хаалбыт кэмҥэ бэйэлэрэ эрэ кыайан дьаһаныа суохтар, алдьаныы-кэһэнии элбэҕэ бэрт. Дойдубутуттан аҕыс уопуттаах тутааччы кэлбиппит. Аҕам саастаахпыт — 67-лээх».

Уолаттары эбиэт кэмигэр туппут буолан, үлэлии сылдьалларын кыайан түһэрбэтим. Сүрдээх сэмэй дьону бэйэм дьаныһан туран хаартыскаҕа түһэрдим.

Кыратык алтыһа түһээт, бу дьону бэркэ испэр киллэрдим. Кинилэр икки бөлөххө арахсан, носуоһунан уу оботторо, муоста көтүрэ, миэбэл таһа сып-сап хомунан бардылар.

Руслан Смирников бэйэтэ идэтинэн физрук эбит. Иккитэ байыаннай дьайыыга баран кэлбит. Аҕа Дойду көмүскэлигэр сылдьыбыт бэтэрээн.
Ырыаҕа ылланар, хоһооҥҥо хоһуллар Кыыс Амма хоһуун, көхтөөх, сылаас сахалыы тыыннаах дьоно тымныы оройо Өймөкөөҥҥө олохтоохтук үлэлии кэлбиттэрин бэркэ сөбүлүү иһиттим. Кырдьык, бу күннэргэ саамай эппиэтинэстээх кэм. Эмиэ ардахтар саҕаланнылар. Онон кыһалҕалаах дьоҥҥо аммалар илиилэрин күүһэ олус наада кэмэ тирээн турар. Уолаттарга таһаарыылаахтык үлэлээн, Тымныы полюһунан аатырар ытык Өймөкөөн дьонугар-сэргэтигэр үтүө өйдөбүлү хаалларалларыгар бигэ эрэллээхпин», — диэн Тамара Винокурова кэпсээтэ.