Амматааҕы айылҕа харыстабылын иниспиэктэрдэрэ оҕолору тулалыыр эйгэни кэтээн көрөргө үөрэтэллэр

Бэҕэһээ, тохсунньу 22 күнүгэр, Амма улууһунааҕы айылҕа харыстабылын иниспиэктэрдэрэ Л.В. Киренскэй аатынан Амматааҕы лиссиэй 3-с кылааһын «Күннүк» айылҕаны кэтииргэ аналлаах күннүктэри (дневниктэри) уонна кыстыыр көтөрдөргө оҥоһуллубут уйалары туттардылар. Бу туһунан СӨ Экологияҕа министиэристибэтэ иһитиннэрэр.

Быйылгы сылга айылҕаны кэтээн көрүү күннүгүн ааптардара, Герасимовтар дьиэ кэргэттэрэ 10-с төгүлүн оҥордулар. Бу күннүккэ оҕолор да, улахан дьон да айылҕа көстүүтүн, күн-дьыл туругун сылы эргиччи бэлиэтэниэхтэрин сөп. Бу күн иниспиэктэрдэр тыыннаах айылҕаҕа тахсар ураты уларыйыылар — фенология туһунан кэпсээтилэр.

Бэлиэтээн эттэххэ, СӨ Экологияҕа министиэристибэтэ сыл аайы ыытар «Наблюдение за природой» куонкуруһа оҕолорго интэриэһи үөскэтэр уонна эдэр чинчийээччилэри буларга көмөлөһөр.