Ан-2 сөмөлүөт саахалын төрүөтэ быһаарылынна

Эдьигээн улууһугар Ан-2 сөмөлүөт күһэлэҥинэн түспүтүн төрүөтэ – двигатель аккаастааһына буолар. Дьокуускайдааҕы Тырааныспар борокуратуурата ыыппыт бэрэбиэркэтин түмүгүнэн маннык быһаарыы ылылынна. Ону таһынан, көтүү куттала суох буолуу сокуонун кэһиитэ тахсыбыта бэлиэтэннэ диэн Илин-Сибиирдээҕи тырааныспар борокуратууратыгар иһитиннэрдилэр.

Салгыҥҥа саахал быйыл сайын – от ыйын 8 күнүгэр тахсыбыта. Дьокуускай (Капитоновка) – Эдьигээн – Өлөөн өрүс хайысхатынан рейси толорон испит сөмөлүөт Тиксии бөһүөлэгиттэн 416 км сиргэ саахалланан түспүт. Кэтээн көрөр-хонтуруоллуур уорган иһитиннэрэринэн, Ан-2 сөмөлүөт көмүс хостооччулар артыалларын бас билиитигэр баар эбит, ол эрээри «Якутия Дискавери» хампаанньаҕа туһаныыга бэриллибит.

Икки пилот көтөргө көҥүллүүр мэдиссиинэ түмүктэрэ суох көппүттэрэ быһаарылынна уонна эбиитин иккис пилот салгын суудунатын салайар бырааба суох эбит. Тэрилтэ дириэктэригэр сокуону кэһиини туоратар туһунан ирдэбил түһэриллибит, ол этии көрүллэн толоруллубут.

«Якутия Дискавери» хампаанньа, салгын суудунатын хамандыыра уонна иккис пилот РФ Административнай быраабы кэһии туһунан кодексатын 11.5 ыстатыйатын 4 уонна 8 чаастарынан (салгын суудунатын туһаныы куттала суох буолуутун быраабылатын кэһии) эппиэккэ тардылыннылар, кинилэргэ ыстараап көрүҥүнэн накаастабыл ананна.