“Анаабыр алмаастара” үбүлүөйдээх ыһыаҕа

“Анаабыр алмаастара” хампаанньаны бытархай боруода баайдаах сирдэргэ алмааһы хостооһуҥҥа инники иһээччинэн, ону таһынан Саха сирин алмааһы хостуур уонна АЛРОСА бөлөх тэрилтэлэриттэн биир бөдөҥ хампаанньанан билинэллэр.

Хампаанньа 25 сыл устата үлэлээн кэлбит үрдүк таһымнаах исписэлиистэригэр уонна талбыт суолларыгар бэриниилээх үлэһиттэригэр махтанар. Баахта үлэһиттэрэ бэл, Уһук Хотугу сир тыйыс усулуобуйатыгар алмааһы хостооһунан дьарыктаныахха сөбүн күннээҕи үлэлэринэн дакаастыыллар. Хампаанньа үбүлүөйдээх кэрэ-бэлиэ күнүнэн үлэһиттэригэр махтанарга быһаарынан, Эбэлээх-Гусинай, Талахтаах уонна Молуода учаастактарга Ыһыах тэрийдэ. Үс сиринэн ыытыллыбыт киэҥ хабааннаах тэрээһиннэргэ баахталартан икки тыһыынча кэриҥэ киһи кытынна.

Саха төрүт бырааһынньыгын дьиҥнээх эйгэтэ үөскээтэ

Хампаанньа үлэһиттэрин 98% — Саха сириттэн төрүттээх. Ол да иһин, ыһыах кинилэргэ сүрүн бырааһынньык. Тэрийээччилэр бырамыысыланнас учаастактарыгар ыһыах дьиҥнээх эйгэтин үөскэтээри олус кыһалыннылар: ыһыах ыһыллар сирин-уотун сахалыы киэргэттилэр, үгэс быһыытынан ыһыах алгыһынан аһылынна, сыанаҕа араас ансаамбыллар уонна эстрада биллэр-көстөр артыыстара таҕыстылар. Ону таһынан эр дьоҥҥо чэпчэки атлетикаҕа күрэхтэһиилэр түмүктэринэн “Анаабыр алмаастарын” саамай күүстээхтэрэ уонна быһыйдара быһаарылыннылар.

Ыһыах саха аһа-үөлэ суох ыһыаҕынан ааттаммат. Ыалдьыттарга анаммыт аһаҕас халлаан анныгар турбут остуолларга саха төрүт аһылыга уонна да атын бырааһынньык аһылыга тобус-толору уурулунна.

«Анаабыр алмаастара» өссө да өр сылларга Саха сирин аатырда турдун”

Хампаанньа үлэһиттэрин сэттэ сыл устата “Анаабыр алмаастара” хампаанньаны салайбыт, билигин АЛРОСА хампаанньа генеральнай дириэктэрэ, бырабылыанньатын бэрэссэдээтэлэ Павел Маринычев эҕэрдэлээтэ. Кини “Анаабыр алмаастара” хампаанньа олохтоох каадырдар бырамыысыланнаска үлэлиир уонна үрдүк ситиһиилэргэ тиийэр кыахтаахтарын көрдөрөр холобур буоларын бэлиэтээтэ.

«25 сыл — үйэ чиэппэрэ. Биллэн турар, бу күн, бастатан туран, бу дьыаланы саҕалаабыт, хампаанньаны тэрийэн, билиҥҥи туругар тириэрдибит үлэһиттэри, хампаанньаны төрүттээбит дьону, бастакы салайааччылары, “Анаабыр алмаастарын” бэтэрээннэрин ахтыахтаахпыт. Кинилэргэ сүгүрүйэбит! Ону сэргэ биһиги тэрилтэбитин сайыннара сылдьар билиҥҥи үлэһиттэрбитигэр махтанабыт. Биһиги “Анаабыр алмаастара” Саха сирин өссө уонунан сылларга аатырда-сураҕырда турарын курдук үлэлиэхпит. Ону биһиги ситиһэр кыахтаахпытыгар эрэнэбин!” — диэн Павел Маринычев тоһоҕолоон бэлиэтээтэ.

Кини үбүлүөйүнэн сибээстээн, “Анаабыр алмаастара” АУо генеральнай дириэктэрэ Алексей Окороковка дьикти бэлэҕи: 2022 сыл от ыйын 13 күнүгэр “Эбэлээх” баайдаах сиргэ хостоммут 217,99 караттаах, “Анаабыр алмаастара” аахсыйалаах уопсастыба 25 сыла” диэн ааттаах алмаас репликатын туттарда.

Кыахпытын кэҥэтэбит

Онтон “Анаабыр алмаастара” АУо генеральнай дириэктэрэ Алексей Окороков тэрилтэ 25 сыл устата кырачаан артыалтан саҕалаан, аныгы улахан тэрилтэҕэ тиийэ суолунан айаннаан кэлбитин бэлиэтээтэ. Билигин хампаанньаҕа үлэ саҥа хайысхатын — көмүһү хостооһуну сайыннарар сыал-сорук турар.

Билигин “Анаабыр алмаастара” — АЛРОСА хампаанньаларын бөлөҕүн алмааһы хосточчуларын — 11%, барыһы киллэрээччилэрин 9% ылар. “Үйэ чиэппэригэр хампаанньа өрөспүүбүлүкэтээҕи муниципальнай бүддьүөккэ 40 миллиард курдук суумалаах нолуогу төлөөтө. 70 миллиард солкуобай суумалаах ыраас барыһы ылла. Бу барыта — биһиги үлэһиттэрбит өҥөлөрүнэн.

Биһиги кэлэктииппит идэлэригэр үрдүк таһымнаах, бэйэлэрин дьыалаларын олус таптыыр дьонтон турар. Эдэр исписэлиистэр уонна уопуттаах үлэһиттэр биһиги хамаандабыт чилиэнинэн буолуохтарын баҕараллар. Билигин кыахпытын кэҥэтэр уонна “Анаабыр алмаастарын” алмааһы эрэ буолбакка, көмүһү эмиэ хостуур хампаанньаҕа уларытар сыал-сорук турар. Онуоха уопсай хостооһуҥҥа көмүс өлүүтэ алмаастааҕар аҕыйах буолуо суоҕа. Биһиги уопсай күүспүтүнэн бу сыалы-соругу ситиһэрбитигэр эрэллээхпин”, — диэтэ Алексей Окороков.

Хампаанньа салайааччыта санаатын үллэстибитинэн, үбүлүөйдээх кэрэ-бэлиэ күнү бириискэлэргэ бэйэтигэр бэлиэтииргэ быһаарыныы мээнэҕэ буолбатах этэ.

“«Анаабыр алмаастара” — оҥорон таһаарар тэрилтэ. Ол иһин, бэйэбит үлэһиттэрбитигэр бырааһынньык тэрээһиннэрин чопчу үлэлиир учаастактарыгар ыытарга быһаарбыппыт. Кэлэктиип дьоно бары олус астыннылар уонна махтаннылар. Төһө да логистика уустуктардааҕын иһин, биһиги барытын сөпкө тэрийэри ситистибит”,  — диэтэ Алексей Окороков.

Бастыҥ үлэлээхтэр наҕараадаланнылар

Үөрүүлээх тэрээһиннэр кэмнэригэр бастыҥ үлэһиттэр алмаас хостооһунун салаатыгар ураты өҥөлөрүн уонна өр сыллаах үтүө суобастаах үлэлэрин иһин араас наҕараадаларынан бэлиэтэннилэр.

Кинилэртэн биирдэстэригэр — “Майаат” бириискэ “Хара Мас” учаастагын наардыыр комплексын начаалынньыга Алексей Тарскайга Саха сирин Ил Дарханын Грамотатын туттардылар. Кини уопсайа 19 сууйар сезоҥҥа үлэлээтэ, ол кэм устата элбэх рационализаторскай быһаарыылары киллэрдэ.

«Мин хайа инженерин идэтигэр үөрэммитим. Үөрэхпин бүтэрээт да, тута “Анаабыр алмаастарыгар” үлэлии кэлбитим. Бастакы сезон кэнниттэн идэбин сөпкө талбыт эбиппин диэн өйдөөбүтүм. Манна 2005 сылтан, хара маҥнайгыттан обогатителынан үлэлиибин. Мин эбээһинэспэр хайа боруодатын сууйуу үлэтэ киирэр. Биһиги сылга 300 тыһыынча туонна уруудаҕа былааммытын толоробут. Мин үлэбин маннык үрдүк таһымҥа сыаналаабыттарыттан олус үөрдүм. Биһиги тэрилтэбит — олус кэскиллээх, кэлэктиип уопуттаах исписэлиистэри эрэ кытары үлэлиир буолбатах, эдэр дьону өйүүр. Мин чопчу манна уонна маннык үчүгэй кэлэктиипкэ үлэлиирбиттэн олус үөрэбин”, — диэн Алексей Тарскай үөрүүтүн үллэһиннэ.

Мария АРХИПОВА суруйуутуттан тылбаас